एजेन्सी – म्यानचेस्टर युनाइटेडले इंग्लिस प्रिमियर लिग बुधबार पूनरागमन जित निकालेको छ । दुई पटक खेलमा पछि परेको युनाइटेडले सेफिल्ड युनाइटेडलाई ४–२ ले हराएको छ ।

घरेलु मैदान ओल्ड ट्राफोडमा युनाइटेड ३५ औं मिनेटमा पछि परेको थियो । सेफिल्डका लागि जयडेन बोग्लेले गोल गरे । युनाइटेडका ह्यारी मगुएरले ४२ औं मिनेटमा गोल फर्काएपछि पहिलो हाफमा खेल १–१ को बराबरी भयो ।

दोस्रो हाफ सुरु भएको पाँचौं मिनेटमा सेफिल्डले दोस्रो पटक खेलमा अग्रता लियो । बेन ब्रेरेटोन डेइजले गोल गरे । तर त्यो अग्रता पनि लामो समय रहेन । ६१ औं मिनेटमा युनाइटेडका कप्तान ब्रुनो फर्नान्डेजले पेनाल्टीमा बराबरी गोल गरे ।

खेलको अन्त्यतिर ४ मिनेटमा युनाइटेडले २ गोल गर्दै खेल आफ्नो पक्षमा पार्यो । फर्नान्डेजले ८१ औं मिनेटमा गोल गर्दै युनाइटेडलार्ई अग्रता दिलाए भने रासमुस होजलाउन्डले ८५ औं मिनेटमा गोल थप्दै जितलाई सहज बनाए ।

३३ खेलपछि युनाइटेड ५३ अंकसहित छैटौं स्थानमा छ । एक खेल कम खेलेको पाँचौं स्थानको टोटनहमको भन्दा युनाइटेडको ७ अंक कम छ ।

लिभरपुल स्तब्ध

उपाधि दौडमा रहेको लिभरपुल बुधबारको खेलमा स्तब्ध भएको छ । एभर्टनले लिभरपुललाई २– ० ले हराएको हो । जितपछि एभर्टनको रेलिगेसनबाट जोगिने सम्भावना बलियो भएको छ । टोली ३३ अंकसहित १६औं स्थानमा छद। लिग जित्ने लिभरपुलको सम्भावना कमजोर बनेको छ ।

एभर्टनले आफ्नो घरेलु मैदानमा लिभरपुललाई सन् २०१० को अक्टोबरपछि पहिलो पटक हराउन सफल भएको हो ।
गुडसन पार्कमा भएको खेलमा जरार्ड ब्रान्टह्वाइटले २७ औं मिनेटमा पहिलो गोल गरे । डोमिनिक क्लेभर्ट–लेविनले ५८ औं मिनेटमा गोल गरेका हुन् ।

अन्य खेलमा बर्नमाउथले उल्भ्सलाई १–० र क्रिस्टल प्यालेसले न्युकासल युनाइटेडलाई ४–२ ले हराएको छ । ३४ खेलपछि दोस्रो स्थानको लिभरपुलको ७४ अंक छ । समान खेलमा ७७ अंक आर्सनल शीर्षस्थानमा छ। दुई खेल कम खेलेको म्यानचेस्टर सिटीको ७३ अंक छ ।