काठमाडौं (हाम्रो खेलकद) – एमेच्योर सदभाव आचार्य र प्रो भुवन नगरकोटी सूर्य नेपाल एनपीजीए टुर च्याम्पियनसीपको दोस्रो दिन संयुक्त रुपमा शीर्षस्थानमा रहन सफल भएका छन् ।

सूर्य नेपाल गल्फ टुर २०२३-२४ अन्तर्गत छैटौं प्रतियोगितामा समग्रमा ९-अन्डर १ सय ३५ को स्कोरमा यी दुईले ५ स्ट्रोकको अग्रता कायम गरेका हुन् । नेपाल नम्बर एक एमेच्योर गल्फर सदभावले दिनको उत्कृष्ट नतिजा निकाल्ने क्रममा ८-अन्डर ६४ को स्कोर लेखाए । पहिलो दिनका संयुक्त लिडर भुवनले आज ६-अन्डर ६६ को स्कोरका साथ शीर्षस्थानमा कायमै रहे ।

आज २-अन्डर ७० खेल्दै समग्रमा ४-अन्डर १ सय ४० सहित विजय श्रेष्ठ एनहाउस तेस्रो स्थानमा छन् । समग्रमा १-अन्डर १ सय ४३ को स्कोर बनाएका युवराज भुजेल, रवि खड्का र निरज तामाङले संयुक्तरुपमा चौथो स्थान बाँडे । युवराजले १-अन्डर ७१ को स्कोर बनाउँदा रवि र निरजले १-ओभर ७३ मा खेल सके ।

३६ होलको समाप्तीमा १३-ओभर १ सय ५७ सम्म स्कोर गर्ने २३ प्रो र ६ एमेच्योर गरी कुल २९ गल्फरले कट बनाए । कुल ८ लाख ४० हजार नगद पुरस्कार राशी रहेको प्रतियोगिताको विजेताले १ लाख ४० हजार नगद पुरस्कार प्राप्त गर्नेछन् । दोस्रो र तेस्रो हुने गल्फरले क्रमश ९६ हजार र ७२ हजार नगद प्राप्त गर्नेछन् । कट बनाएका २३ प्रो गल्फर मध्ये उत्कृष्ट २१ गल्फरले नगद पुरस्कार प्राप्त गर्नेछन् ।