ढोरपाटन भलिबलमा रिड मोडल र एपिएफको पुनः संयुक्त अग्रता

काठमाडौं (हाम्रो खेलकुद)– भारतीय खेलाडी सम्मिलित रिड मोडल र एपिएफ १२ औं ढोरपाटन डबल लिग महिला भलिबल प्रतियोगितामा पुनः संयुक्त रुपमा शीर्षस्थानमा रहेका छन् । शुक्रबार दोहोरो जित निकाल्दै स्वयम्भू ठूलो भ¥याङको रिड मोडल कलेजले एपिएफसँग अंक बराबरी गरेको हो ।

रिड मोडलले लिग अंकतालिकाको पुछारमा रहेको आयोजक ढोरपाटन क्लबलाई २५–८, २५–१२ र २५–७ ले र पश्चिमाञ्चल क्षेत्रिय विकासलाई २५–१४, २५–१२ र २५–८ ले हरायो ।

रिड मोडल र एपिएफको समान ३९ अंक छ । रिड मोडलले १३ र एपिएफले त्यो भन्दा एक खेल बढी खेलेको छ । एपिएफले पहिलो चरणमा उच्च प्रर्दशन गरेको न्यू डायमन्ड एकेडेमीलाई २५–१३, २५–२७, २५–१५ र २५–२१ ले पराजित गरेको थियो ।

१३ खेलमा न्यु डायमन्डको ३० अंक छ । शुक्रबार नै विभागिय टोली नेपाल पुलिस क्लबले अर्को विभागिय टोली त्रिभुवन आर्मीलाई २५–१८, २५–२२ र २५–२० ले हरायो । १४ खेलमा २७ अंकसहित पुलिस चौथो स्थानमा छ भने त्यत्तिनै खेलमा पश्चिमाञ्चलको २१ अंक छ । १४ खेलमा आर्मी १५ र १५ खेलमा ढोरपाटनको ८ अंक छ ।