काठमाडौं (हाम्रो खेलकुद) – नेपालका शीर्ष दुई एमेच्योर गल्फर सुभाष तामाङ र सद्भाव आचार्य एसिया प्यासिफिक एमेच्योर च्याम्पियनसिपमा प्रतिस्पर्धा गर्न आइतबार अष्ट्रेलिया प्रस्थान गर्ने भएका छन् ।

बिहीबारदेखि सुरु हुने प्रतियोगिताका लागि सुभाष र सद्भावसँगै नेपाल गल्फ संघका युवा विकास निर्देशक दीपक आचार्य टोलीको प्रशिक्षक एवं व्यवस्थापकको भूमिकामा रहनेछन् । गत वर्ष थाइल्याण्डमा भएको प्रतियोगितामा सुभाषले कट पार गर्दै अन्तिम दुई चरण पनि खेलेका थिए ।

यसपटक गल्फ संघले शीर्ष १० मा पर्ने लक्ष्यसहित टोलीलाई तयार गरेको जनाएको छ । संघका अध्यक्ष टासी घलेले आयोजक एसिया प्यासिफिक गल्फ महासंघलाई नेपालका दुई खेलाडीलाई प्रतिस्पर्धा गर्ने अवसर दिएकोमा धन्यवाद व्यक्त गरे ।

अध्यक्ष घलेले चीनमा भएको एसियाली खेलकुदमा नेपालको प्रदर्शन सन्तोषजनक रहन नसकेको समेत स्वीकारे । उनले खेलाडीहरु लगातार अस्वस्थ हुँदा प्रदर्शनमा असर परेको जानकारी दिँदै आउने दिनमा अझ राम्रो तयारीका साथ प्रतियोगिताका लागि प्रस्थान गर्ने बताए ।

तीन सदस्यीय नेपाली टोली आइतबार अष्ट्रेलिया प्रस्थान गर्नेछ । सोमबार अष्ट्रेलिया पुग्ने टोलीले दुई दिन अभ्यास गरेर प्रतियोगितामा सहभागिता जनाउनेछन् । सुभाषले एमेच्योरको रुपमा खेल्ने यो नै अन्तिम प्रतियोगिता रहने सम्भावना रहेको छ । उनले यसपछि होल्डमा रहेको प्रो कार्ड लिएर व्यावसायिक करिअर सुरु गर्ने बुझिएको छ ।