काठमाडौं (हाम्रो खेलकुद) – नेपालका तीव्र गतिका बलरले त्रिकोणात्मक टि२० आई सिरिजमा युएईविरुद्ध राम्रो सुरुवात दिलाएका छन् । माथिल्लो मुलपानी क्रिकेट मैदानमा टस हारेर पहिला ब्याटिङको निम्तो पाएको युएईले ८ ओभरमा ३ विकेट गुमाउँदै ४७ रन बनाएको छ ।

युएईका आसिफ खान १५ र अली नसिर ६ रनमा क्रिजमा छन् । नेपालले सुरुवाती सात ओभरमा तीन विकेट लिँदै मुलपानीमा युएईलाई दबाबमा राखेको छ ।

नेपाललाई तीव्र गतिका बलर सोमपाल कामीले पहिलो ओभरको अन्तिम बलमा पहिलो सफलता दिलाएका थिए । युएईका लागि डेब्यू खेल खेलेका ओपनर खलिद शाह ठूलो सटको धुनमा मिडअफमा कप्तान रोहित पौडेलबाट क्याच आउट भए । उनले ६ बल खेल्दा खाता खोल्न सकेनन् ।

करण केसीको चौथो ओभरको पहिलो बलमा एलिशान शराफु एज लागेर ६ रनमा विकेटकिपर आसिफ शेखबाट क्याच आउट भए । तेस्रो विकेटका लागि आसिफ खान र मोहम्मद वासिमले २४ रनको साझेदारी गरेका थिए ।

गुलशन झाको सातौं ओभरको पहिलो बलमा लङअनमा सर्ट खेल्न चाहेका वासिम मिडविकेटमा कुशल भुर्तेलबाट १७ रनमा क्याच आउट भए । वासिमले १८ बलमा १ चौका र १ छक्का प्रहार गरे । सुरुवाती तीन विकेट नेपालका तीव्र गतिका बलरले लिएका छन् ।