सुबास हुमागाईं, हाङ्गचौ

तेक्वान्दोका प्रेमबहादुर लिम्बु नेपाललाई १९ औं एसियाली खेलकुदमा पहिलो पदक दिलाउनबाट चुकेका छन् ।

लिनान स्पोर्ट्स कल्चर एण्ड एक्जिबिसन सेन्टरमा भएको क्वाटरफाइनलमा फिलिपिन्सका प्याट्रिक किंग पेरेजसँग पराजित भएसँगै उनी पदकबाट बन्चित भएका हुन् । यो खेल जितेको अवस्थामा सेमिफाइनल पुग्दै पदक पक्का हुने भएपनि प्रेम पराजित हुन पुगे ।

प्रेमले त्यसअघि अन्तिम १६ को स्पर्धामा पाकिस्तानका अब्दुल उल्लाह कादिरलाई पराजित गरेका थिए । औसतमा ७.३६० ल्याएको प्रेमले ७.२५० ल्याएका कादिरलाई हराएका थिए ।

तर क्वाटरफाइनलमा भने उनी पराजित भए । पेरेजले क्वाटरफाइनलमा औसत ७.५६० अंक जोड्दा प्रेमले पछिल्लो चरणभन्दा कमजोर ७.१६० को स्कोर ल्याए ।

त्यस्तै महिला पुम्सेतर्फ नेपालको चुनौती पहिलो खेलमै सकिएको थियो । अन्तिम १६ को प्रतिस्पर्धामा स्वस्तिका तामाङ सिंगापुरकी अकिदा बिन्ते दियानासँग पराजित भइन् । स्वस्तिकाले औसत ७.२५ अंक ल्याउँदा दियानाले दुवै राउन्डमा ७.६ अंक जोडेकी थिइन् ।

तेक्वान्दोमा अब सोमबार नेपालकी लागि अन्जली तामाङले महिला ४९ केजी तौल समूहमा कम्बोडियाकी लाइदेन क्रीसँग खेल्नेछिन् । साउदी अरबका पुरुष ५८ केजीमा राहुल कुमालले रियाद हाम्दीसँग प्रतिस्पर्धा गर्नेछन् । दुवै स्पर्धा राउन्ड अफ ३२ चरणका हुन् ।