हाङ्गचौ (हाम्रो खेलकुद) – नेपालको महिला र पुरुष टेबल टेनिस टोली १९ औं एसियाली खेलकुदको टिम इभेन्टमा समूह चरणबाट नै बाहिरिएका छन् ।

शनिबार गोङ्गशु क्यानल जिमेन्जियममा भएको समूह चरणको दोस्रो खेलमा महिला टोली समूह एफमा दक्षिण एसियाको भारतसँग पराजित हुँदा पुरुष टोलीले उत्तर कोरियासँग हार बेहोरेको हो । दुवै खेलमा नेपाल ३-० ले पराजित भएको हो ।

महिलातर्फ पहिलो खेलमा सिक्क सुवाल दिया पराग चितालेसँग ११-१, ११-६, ११-८ ले पराजित भएकी थिइन् । त्यसपछि नविता श्रेष्ठले यहिका मुखर्जीसँग ११-३, ११-७, ११-२ को हार बेहोरिन् । तेस्रो खेलमा इभान थापा मगर सुतिर्था मुखर्जीसँग ११-१, ११-५, ११-२ ले हारेपछि नेपाल समूह चरणबाट बाहिरिएको थियो ।

महिला टोली यसअघि शुक्रबार सिंगापुरसँग पनि ३-० ले नै पराजित भएको थियो । यस समूहमा भारतले दुवै खेल जित्दै समूह विजेता बनेको छ । शुक्रबार भारतले सिंगापुरलाई ३-२ ले हराएको थियो ।

यता पुरुषतर्फ पनि नेपाल समूह बीको पुछारमा रहेर बाहिरियो । शुक्रबार जापानसँग हारेको नेपालले उत्तर कोरियाविरुद्ध पनि कुनै खेल जित्न सकेन ।

पहिलो खेलमा हाम युसोङले संयोग कपालीलाई ११-७, ११-४, ११-५ ले हराए । दोस्रो खेलमा रुविन महर्जन जिसोङ आङसँग ११-२, ११-६, ११-२ ले पराजित भए । विलोश श्रेष्ठले जोङसिक रीसँग ११-८, ११-२, ११-३ को हार बेहोरेपछि नेपालको चुनौती समाप्त भएको थियो ।