काठमाडौं (हाम्रो खेलकुद) – रिड मोडल कलेज र एपिएफबीच १२ औं ढोरपाटन डबल लिग महिला भलिबल प्रतियोगिता उपाधि दौडका लागि प्रतिस्पर्धा हुने देखिएको छ । यद्दपी एपिएफ भन्दा रिड मोडल प्रतियोगितामा केही माथि देखिएको छ ।

रिड मोडलकी कप्तान मिनिमलको स्पाइकलाई ब्लक गर्ने प्रयासमा पुलिसका खेलाडी ।

प्रतियोगिताको दोस्रो चरणमा बुधबार रिड मोडल र एपीएफले आ–आफ्नो खेल जितेका छन् । दुवैको समान ३३ अंक पुगेको छ । रिड मोडलले १ खेल कम खेल्दा एपिएफले १२ खेल खेलेको छ । भारतीय राष्ट्रिय खेलाडी सम्मिलित रिड मोडलले बुधबार अर्को विभागिय टोली नेपाल पुलिस क्लबलाई २५–६, २५–१८ र २५–९ ले हरायो । रिड मोडलकी क्रिन्जल वुमन अफ द म्याच घोषित भइन् । एपिएफले अर्को विभागीय टोली नेपाल आर्मीलाई २५–१०, २५–१५ र २५–२३ ले पराजित गर्यो ।
लिग अंक तालिकाको तेस्रो स्थानमा रहेको न्यू डायमन्ड एकेडेमीले पश्चिमाञ्चल क्षेत्रिय भलिबल संघलाई २५–२०, २३–२५, २५–२० र २५–१५ ले पराजित गर्दा विजयी टोली न्यू डायमन्डकी कृपा अधिकारी वमन अफ म्याच घोषित भइन् ।
अर्को खेलमा पुलिसले आयोजक ढोरपाटनलाई २५–१२, २५–१७ र २५–१३ ले हराएको थियो । दुबै खेलमा उत्कृष्ट प्रदर्शन गरेकी पुलिसकी कमला पुनले वुमन अफ द डेको उपाधि जितिन् । उनलाई भिक्टोरिया इन्टरनेशनल होटल ट्रेनिङ इन्स्टिच्युटले निशुल्क ३ महिने होटल म्यानेजमेन्ट तालिमको अवसर प्रदान गरेको छ ।
लिगमा न्यू डायमन्डको ११ खेलबाट २७ अंक छ भने पुलिसको १२ खेलबाट २१ अंक छ । त्यस्तै पश्चिमाञ्चल १२ खेलबाट २१ अंक जोडदै पाँचौं स्थानमा छ । आर्मीको १२ खेलबाट १५, ढोरपाटनको १२ खेलबाट ८ अंक छ ।