काठमाडौं (हाम्रो खेलकुद) – एनएसआरए इन्टर क्लब स्क्वास टिम च्याम्पियन्सीप २०२३ को दोस्रो दिन क्लब इन्टरनेसनल र आयोजक एनएसआरए टिम ए आफ्नो समूहमा शीर्ष स्थान बनाउन सफल भएका छन् ।

नेपाल स्क्वास एन्ड र्याकेट्स संघको आयोजनामा भएको प्रतियोगितामा दोस्रो दिन बिहीबार क्लब इन्टरनेसनलले एनएसआरए टिम बी लाई तीनै खेलमा पराजित गर्यो । सातदोबाटोस्थित स्क्वास हलमा क्लब इन्टरनेसनलका इटालीका रेन्जो एन्डोर्नोले पछिल्लो एसियाली खेलकुदमा नेपालको प्रतिनिधित्व गरेका राजेन्द्र शाक्यलाई सीधा सेटमा ३–० हराएका थिए । रेन्जो होङजाउ एसियाडमा प्रतिनिधित्व गर्ने नेपाली स्क्वास टिमलाई प्रशिक्षण दिन नेपाल आउनुभएका प्रशिक्षक हुन् ।

‘क्वालिफाइड लेभल टु’ प्रशिक्षक रेन्जोले गत जेठ महिनामा पनि नेपाली राष्ट्रिय स्क्वास टिमलाई एक महिना प्रशिक्षण दिएका थिए । क्लब इन्टरनेसनलाई जित दिलाउन अन्य खेलमा अस्ट्रेलियाका इशाक बेल हर्बर्टले प्रवीणवीर सिंह कंसाकारर्लाइ ३–१ र धिर पुनले प्रज्वल प्रधानलाई ३–० ले हराए । क्लब इन्टरनेसनलको दुई खेलबाट आठ अङ्क बनाएर समूह बीमा अग्रस्थान छ। एनएसआरए बी दोस्रो स्थानमा छ ।

आयोजक एनएसआरए टिम एले समूह एमा शीर्ष स्थान बनाउने क्रममा आप्mनो दोस्रो खेलमा एनएसआरए टिम सीलाई तीनै खेलमा हरायो । दिपक थापाले पासाङ लामा र दिव्यराज वज्राचार्यले राकेश परियारलाई ३–० र उमित शाक्यले विकास मगरलाई ३–१ ले निराश बनाए ।

अन्य स्पर्धामा ब्रिटिस आर्मी एले ब्रिटिस आर्मी सीलाई २–१ ले पराजित गर्यो । सुनील रानाले शेरजङग थापालाई ३–० ले हराएर ब्रिटिस आर्मी एलाई अगाडि थियो । तर शंकर रगुरुङले श्याम तामाङलाई ३–२ सेटमा हराएर स्कोर १–१ मा ल्याए । त्यसपछि निर्णायक खेलमा सविना गुरुङलाई केशर मगरमाथि ३–२ को कगिठन जित निकालेर ब्रिटिस आर्मी एलाई जित दिलाए ।

समूह बीमा ब्रिटिस आर्मी बीले ट्रेलिङ स्पाउजलाई तीनै खेलमा हरायो । ज्याकब क्लार्कले ल्युक सयर, जिम डोइगले माइक रान्डल र दिलिप राईले डेभिड थोम्सनलाई समान ३–० ले सोझो सेटमा पराजित गरे ।