ढोरपाटन महिला भलिबलमा एपिएफको दोहोरो जित

रिड मोडल शीर्षस्थान यथावत

काठमाडौं (हाम्रो खेलकुद) – एपिएफले १२ औं ढोरपाटन डबल लिग महिला भलिबल प्रतियोगिताको दोस्रो चरणको खेलमा दोहोरो सफलता हासिल गरेको छ । मंगलबार पहिलो खेलमा पश्चिमाञ्चल क्षेत्रिय भलिबल संघलाई ३–० को पराजित गरेको एपिएफले अर्को खेलमा नेपाल पुलिस क्लबलाई त्यत्तिनै अन्तरमा हराएको थियो ।

एपिएफ पश्चिमाञ्चललाई २५–१५, २५–१५ र २५–१४ ले पुलिसलाई २५–१७, २५–१७ र २५–१२ ले हराएको थियो । दोहोरो जितपछि एपिएफले रिड मोडल कलेजसँग अंक बराबरी गरेको छ । एपिएफका ११ खेलमा ३० अंक पुगेको छ । एक खेल कम खेलेको शीर्षस्थानको रिड मोडलको पनि ३० अंक छ । मंगलबार दोस्रो चरणको अर्को खेलमा रिडले नेपाल आर्मीलाई २५–९, २५–९ र २५–८ ले हरायो ।
अन्य खेलमा न्यु डायमन्ड एकेडेमी, नेपाल आर्मी र पश्मिाञ्चलले पनि सफलता प्राप्त गरे । न्यु डायमन्डले आयोजक ढोरपाटन स्पोर्टस् क्लबलाई २५–११, २५–१० र २५–२१ ले हरायो । आर्मीले ढोरपाटन स्पोर्टस् क्लबलाई आर्मी २५–९, १२–२५, २५–१२ र २५–१६ ले हरायो । पश्चिमाञ्चलले ढोरपाटनलाई ३–० को सेटमा पराजित गर्यो ।