काठमाडौं (हाम्रो खेलकुद) – मोबाइल इगेमिङको माध्यमबाट नेपाललाई विश्वभर चिनाएको भन्दै द रिअल सोल्जर्स (डिआरएस) गेमिङलाई रु. एक लाखको ‘युथ आइकन नेपाल’ पुरस्कार प्रदान गरिएको छ ।

युनिभर्सल कलेज र फिनिक्स कलेजको आयोजनामा काठमाडौं युथ कनक्लेभ (केवाइसी) २०८० मा टोलीलाई पुरस्कृत गरिएको हो । कमलादीस्थित नेपाल प्रज्ञा–प्रतिष्ठानको सभाहलमा भएको कार्यक्रममा गीत, संगीत, हास्यब्यङ्ग्यसहित देशका ख्यातिप्राप्त व्यक्तित्वहरुले आफ्ना सफलताका कथा, उर्जा र उत्प्रेरणाका विचारहरु प्रस्तुत गरेका थिए ।

कार्यक्रममा नेपालकै चर्चित आँखा रोग विशेषज्ञ डा. सन्दुक रुइत, मास्टरसेफ सन्तोष साह, डिआरएस गेमिङ, क्रिकेटर पारस खड्का, इसेवाका सिइओ जगदिश खड्का लगायतले आ–आफ्ना प्रस्तुति दिएका थिए । कार्यक्रममा गायकहरु नितेशजंग कुँवर, समृद्धि राई, कमेडियन सजन श्रेष्ठ लगायतको प्रस्तुती रहेको थियो ।

करिब ५ हजार विद्यार्थी तथा युवाहरुको कार्यक्रममा सहभागिता रहेको आयोजकले जानकारी दियो । नेपालमै रहेर उल्लेख्य प्रगति गरेका ख्यातिप्राप्त व्यक्तिहरुको सफलताका कथा युवामा वितरण गर्नु, नेपाली उत्पादनको प्रवर्द्धन गर्नु, नेपालमै बसेर पनि केही गर्न सकिन्छ भन्ने सन्देश दिनु र केही हदसम्म भए पनि युवाहरुलाई विदेश पलायन हुनबाट रोक्नु यो कार्यक्रमको उद्देश्य हो । हरेक वर्ष आयोजना हुँदै आएको यो केवाइसीको चौथो श्रृङ्खला हो ।