गण्डकीको पहिलो जित

काठमाडौं (हाम्रो खेलकुद) – गण्डकी प्रदेशले सातौं प्रधानमन्त्री कप एनभिए महिला तथा पुरुष राष्ट्रिय भलिबल लिगमा पहिलो जित हात पारेको छ । गण्डकीले शैलुङ बागढुङ्गा स्पोर्ट्स क्लबलाई ३-२ को सेटमा पराजित गर्दै पहिलो जित हात पारेको हो ।

राष्ट्रिय खेलकुद परिषद् (राखेप) को कभर्डहलमा भएको खेलमा गण्डकीले २५-१६, २५-१३, १९-२५, २०-२५ र १५-६ को सेटमा जित हात पारेको हो । गण्डकी यसअघि लगातार चार खेलमा पराजित हुँदै फाइनल दौडबाट बाहिरि सकेको छ । गण्डकीले शुक्रबार अन्तिम खेल दावाली मिलन क्लबसँग खेल्नेछ ।

गण्डकी फाइनलमा पुग्न नसकेपछि तीन भारतीय खेलाडी जोजेबिन, कन्चन नविन र थारुन गोडालाई बुधबार नै घर फर्काएको थियो । भारतीय खेलाडीलाई घर फर्काएपछि खेलेको खेलमा गण्डकीले पहिलो जित हात पारेको हो ।

शैलुङ ६ खेलमा ५ मा हार र १ मा जितसहित छैटौं स्थानमा रहेर बाहिरयो । गण्डकी ५ खेलमा १ मा जित र ४ मा हारसहित पाँचौं स्थानमा छ ।