काठमाडौं (हाम्रो खेलकुद) – टिपटप हेल्प नेपालले सातौं प्रधानमन्त्री कप एनभिए महिला तथा पुरुष राष्ट्रिय भलिबल क्लब लिगमा नेपाल पुलिस क्लबमाथि रोमान्चक जित हात पारेको छ । निकै कडा प्रतिस्पर्धा भएको खेलमा हेल्प नेपालले पुलिसमाथि ३–२ को सेटमा हात पार्दै फाइनल सम्भावना मजबुत बनाएको छ ।

राष्ट्रिय खेलकुद परिषद् (राखेप) को कभर्ड हलमा भएको खेलमा हेल्प नेपालले २५–२०, २०–२५, ३०–२८, १८–२५ र २४–२२ को सेटमा पुलिसलाई हराएको हो । उत्कृष्ट प्रतिस्पर्धा भएको खेलमा अन्तिम सेटमा हेल्प नेपालले जित हात पार्न सफल भएको हो ।

अन्तिम सेटको अन्तिम समयमा हेल्प नेपालले २२–२२ बराबरी अवस्थाबाट दुई लगातार अंक बटुल्दै जित पक्का गर्यो । हेल्प नेपालको जितमा दुई पाकिस्तानी खेलाडी माजहर र अ‍ैमल खानको प्रदर्शन नायक रह्यो ।

पुलिसले सानदार प्रदर्शन गरेपनि जित भने निकाल्न सकेन । पुलिस पराजित भएपनि विशाल विक, रविन चन्द, सफल विक र कुलबहादुरको प्रदर्शन भने उच्च थियो ।

पाँचौं सेट १५ मा सकिनु पर्ने थियो । तर दुबै टोलीले सानदार प्रदर्शन गरेपछि २४ मा पुगेको थियो । चौथो सेटमा भने पुलिसले हेल्प नेपालमाथि सहज जित निकालेको थियो ।

तेस्रो सेटमा कडा प्रतिस्पर्धा हुँदा अन्तिममा हेल्प नेपालले ३०-२८ को अवस्थामा जितेको थियो । तेस्रो सेटको निर्णायक अंक सन्जु विक्रम शाहको ब्लकमा हेल्प नेपालले प्राप्त गरेको थियो ।

हेल्प नेपाल ४ खेलमा ११ अंकका साथ शीर्ष स्थानमा छ । अव केहि समयमा त्रिभुवन आर्मी क्लब र नेपाल एपिएफ क्लबबीच प्रतिस्पर्धा हुनेछ ।