काठमाडौं (हाम्रो खेलकुद) – शैलुङ्ग बागढुंङ्गा स्पोर्ट्स क्लबले सातौं प्रधानमन्त्री कप एनभिए महिला तथा पुरुष राष्ट्रिय क्लब लिगमा दावाली मिलनमाथि रोमान्चक जित हात पारेको छ । फाइनल दौडबाट बाहिरी सकेको शैलुङ्गले दावालीलाई हराउँदै पहिलो जित हात पारेको हो ।

राष्ट्रिय खेलकुद परिषद् (राखेप) को कभर्डहलमा भएको खेलमा शैलुङ्गले २५-१९, १४-२५, २२-२५, २५-२१ र १५-१३ को सेटमा जित हात पारेको हो । पहिलो सेटमा विजयी भएको शैलुङ्गले त्यसपछि लगातार दुई सेट गुमाएको थियो । चौथो र पाँचौं सेटमा जित निकाल्न सफल भयो ।

निर्णायक पाँचौं सेटमा सुरुवाती समय शैलुङ्ग ८-५ ले पछि रहेको अवस्थामा थियो । तर त्यसपछि लगातार पाँच अंक बटुलेपछि १०-८ को अग्रता लिँदै जितको आधार तय गर्यो । १२-१२ को अवस्थाबाट शैलुङ्गले लगातार दुई अंक जोडेपछि जित पक्का जस्तै बनाएको थियो ।

आजको दोस्रो खेलमा नेपाल पुलिस क्लब र टिपटप हेल्प नेपालबीच केहि समयपछि प्रतिस्पर्धा हुनेछ । पुरुषतर्फ दिनको अन्तिम खेल दिउँसो १ बजे नेपाल आर्मी र नेपाल एपिएफ क्लबची प्रतिस्पर्धा हुनेछ ।

शैलुङ्गले आफ्नो अन्तिम खेल बिहीबार गण्डकी प्रदेशसँग खेल्नेछ । दावालीले आफ्नो अन्तिम खेल शुक्रबार गण्डकीसँग खेल्नेछ । गण्डकीपनि लगातार चार हारको साथ बाहिरि सकेको छ ।