काठमाडौं (हाम्रो खेलकुद) – उपाधिको दाबेदार टिप टप हेल्प नेपालले स्पोर्ट्स क्लबले सातौं प्रधानमन्त्री कप एनभिए महिला तथा पुरुष क्लब भलिबल च्याम्पियनसिपमा लगातार दोस्रो जित हात पारेको छ । हेल्प नेपालले दावाली मिलन क्लबमाथि सोझो सोटमा जितका साथ महत्वपूर्ण ३ अंक तालिकामा जोडेको छ ।

राष्ट्रिय खेलकुद परिषद् (राखेप) को कभर्ड हलमा भएको खेलमा हेल्प नेपालले दावाली मिलन क्लबमाथि २५-१७, २५-२२ र २५-२१ को सेटमा जित हात पारेको हो ।

एक समय ८-९ को अवस्थामा रहेको हेल्प नेपालले लगातार पाँच अंक बटुल्दै सहज जितको आधार तय गरेको थियो । तर दोस्रो सेटमा सुरुवाती समय दावाली मिलने अग्रता लिएको थियो । सुरुवातमा ९-७ को अग्रता लिएको दावालीले केहि समय दबाबमा राखेको थियो ।

१७-१७ को बराबरी अवस्थामा पुगेको खेलमा त्यसपछि हेल्प नेपाल अघि बढेको थियो । तेस्रो सेटको सुरुवाती समय पनि दावाली मिलनले नै अग्रता लिएको थियो । एक समय मिलन ९-६ ले अघि लिएको थियो । खेलमा उच्च प्रतिस्पर्धा रहँदा हेल्प नेपालले १२ अंकपछि अग्रता लिएको थियो ।

तर त्यो अग्रता धेरै समय टिक्न दिएन । लगातार उच्च प्रतिस्पर्धा भएको खेल १९-१९ को बराबरीमा थियो । दावाली २१-२२ ले पछि रहँदा लगातार तीन अंक जोड्दै हेल्प नेपालले जितको आधार तय गरेको थियो ।

दावाली पहिलो खेलमा एपिएफ र आर्मीसँग ३-० को सोझो सेटमा पराजित भएको थियो । टिपटप हेल्प नेपालले पहिलो खेलमा सैलुङ बागढुङ्गामाथि ३(० को सहज जित हात पारेको थियो । टिपटप हेल्प नेपालले मंगलबार गण्डकी प्रदेशसँग खेल्नेछ । दावालीले मंगलबार नेपाल पुलिस क्लबसँग खेल्नेछ ।

आज दिउँसो चार बजे गण्डकी प्रदेश र आर्मीबीच प्रतिस्पर्धा हुँदैछ । सुरुवाती दुई खेल हारेको गण्डकीलाई जित्नै पर्ने दबाब छ । आजको अन्तिम खेलमा नेपाल पुलिस र सैलुङबीच प्रतिस्पर्धा हुनेछ ।