काठमाडौं (हाम्रो खेलकुद) – गण्डकी प्रदेश सातौं प्रधानमन्त्री कप एनभिए महिला तथा पुरुष राष्ट्रिय भलिबल क्लब च्याम्पियनसिपमा लगातार दोस्रो खेलमा पराजित भएको छ । गण्डकी आइतबार नेपाल एपिएफ क्लबसँग ३(१ को सेटमा पराजित भएको हो ।

राष्ट्रिय खेलकुद परिषद् (राखेप) को कभर्ड हलमा भएको खेलमा एपिएफ २१-२५, २५-२१, २५-२३ र २५-१७ ले विजयी भएको हो । पहिलो सेटमा गण्डकीले १५-१८ को नतिजाबाट पूनरागन गर्दै १८-१८ बराबरीमा पुर्याएको थियो । त्यो समय सम्म गण्डकी सेटमा पछि थियो । लगातार चार अंक जोडेपछि गण्डकीले पहिलो सेटमा जितको आधार तय गरेको थियो ।

दोस्रो सेटमा गण्डकी १-६ मा थियो । उक्त अवस्थाबाट सानदार पूनरागमन गर्दै ७-७ को बराबरी गरेको थियो । निकै प्रतिस्पर्धात्मक सेटमा १३-१३ को बराबरीबाट एपिएफले लगातार चार अंक जोडेपछि सेटमा अग्रता लिँदै जितको आधार तय गरेको थियो । तेस्रो सेट पनि निकै उच्च प्रतिस्पर्धा रह्यो ।

चौथो सेटमा एक समय गण्डकी खेलमै थियो । गण्डकी १३-१५ को अवस्थामा थियो । तर उक्त अवस्थाबाट एपिएफले लगातार ८ अंक जोडेपछि गण्डकीको जितको सम्भावना सकिएको थियो । एपिएफको जितमा विजय थापा प्लेयर अफ म्याच चुनिए । एपिएफलाई जिताउन विजय, टेकराज अवस्थी र हेमन्त मल्लको प्रदर्शन उच्च रह्यो ।

उता तीन भारतीय खेलाडी सम्मिलित गण्डकी लगातार दोस्रो हारका साथ दबाबमा परेको छ । पहिलो खेलमा गण्डकी नेपाल पुलिस क्लबसँग २-३ को सेटमा पराजित भएको थियो । गण्डकीमा आएका तीन भारतीय कुमार थारुन, जोजेबिन र कन्चन नविन मञ्जुनाथको प्रदर्शन सोचे जस्तो रहन सकेन । रवि केसी र हिमाल सुनारीको जोडीले जिताउन प्रयास गरेपनि सफल हुन सकेनन् ।

गण्डकीले आफ्नो तेस्रो खेल सोमबार त्रिभुवन आर्मी क्लबसँग खेल्नेछ । एपिएफले पहिलो खेलमा दावाली मिलनलाई ३-० को सोझो सेटमा हराएको थियो । एपिएफले मंगलबार सैलुङसँग खेल्नेछ ।

आज नै भएको पहिलो खेलमा टिपटप हेल्प नेपालले सैलुङमाथि २५-१२, २५-१५ र २५-१९ को सहज जित हात पारेको हो । तीन पाकिस्तानी खेलाडी सम्मिलित हेल्प नेपालले खेलमा एकल प्रदर्शन गरेको थियो ।

पाकिस्तान भलिबल टोलीका कप्तान अ‍ैमल खान र मजहर अलीको स्पाइक र सर्भिस सामु सैलुङका खेलाडी कमजोर देखिएका थिए । आजको दोस्रो खेलमा त्रिभुवन अर्मी क्लबले दावाली मिलनमाथि सोझो सेटमा जित हात पार्यो ।

आर्मीले २५-१९, २५-११ र २५-२० को सोझो सेटमा हात पारेको हो । आज अव महिलातर्फ खेल हुनेछन् । महिलातर्फ केहि समयमा एपिएफ र आर्मीबीच प्रतिस्पर्धा हुनेछ । दिउँसो ४ बजे न्यु डायमन्ड र गण्डकीबीच प्रतिस्पर्धा हुनेछ । दिनको अन्तिम खेलमा ६ बजे पुलिस र एभरेष्टबीच प्रतिस्पर्धा हुनेछ ।