काठमाडौं (हाम्रो खेलकुद) – उपाधिको दाबेदार टिपटप हेल्प नेपाल स्पोर्ट्स क्लबले सातौं प्रधानमन्त्री कप एनभिए महिला तथा पुरुष राष्ट्रिय भलिबल क्लब च्याम्पियनसिपमा सैलुङ बागढुङ्गालाई सोझो सेटमा पराजित गर्दै विजयी सुरुवात गरेको छ ।

हेल्प नेपालले सैलुङमाथि २५-१२, २५-१५ र २५-१९ को सहज जित हात पारेको हो । तीन पाकिस्तानी खेलाडी सम्मिलित हेल्प नेपालले खेलमा एकल प्रदर्शन गरेको । पाकिस्तान भलिबल टोलीका कप्तान अ‍ैमल खान र मजहर अलीको स्पाइक र सर्भिस सामु सैलुङका खेलाडी कमजोर देखिएका थिए ।

तेस्रो सेटमा भने सैलुङले खेलमा प्रतिस्पर्धा गरेको थियो । एक समय ११-११ को बराबरीबाट भने टिप टप हेल्प नेपालले सैलुङलाई पछि छाड्दै अघि बढेको थियो । सैलुङ पहिलो खेलमा आर्मीसँग ३-० को सेटमा पराजित भएको थियो ।

सैलुङले अव सोमबार नेपाल पुलिस क्लबसँग खेल्नेछ । त्यस्तै टिपटप हेल्प नेपालको भने यो पहिलो खेल हो । हेल्प नेपालले सोमबार दावाली मिलसँग खेल्नेछ ।

आज प्रतियोगितामा ६ खेल हुनछेन् । बिहान १० बजे आर्मी र दावाली मिलनबीच प्रतिस्पर्धा हुनेछ । दिउँसा १२ बजे गण्डकी र एपिएफ भिड्नेछन् ।

महिलातर्फ दिउँसो २ बजे एपिएफ र आर्मीबीच प्रतिस्पर्धा हुनेछ । दिउँसो ४ बजे न्यु डायमन्ड र गण्डकीबीच प्रतिस्पर्धा हुनेछ । दिनको अन्तिम खेलमा ६ बजे पुलिस र एभरेष्टबीच प्रतिस्पर्धा हुनेछ ।