काठमाडौं (हाम्रो खेलकुद) – टिप टप हेल्प नेपाल स्पोर्ट्स क्लबले सातौं प्रधानमन्त्री कप एनभिए महिला तथा पुरुष राष्ट्रिय भलिबल क्लब लिगका लागि पाकिस्तानका तीन खेलाडी भित्र्याउने भएको छ ।

गत सिजन लिगको उपविजेता बनेको हेल्प नेपालले यसपटक उपाधि जित्ने लक्ष्यसहित बलियो टोली निर्माण गरेको छ । लिबेरो दिपक थापाको कप्तानीमा घोषित टोलीको उपकप्तानमा सन्जु विक्रम शाह रहेका छन् । पाकिस्तानका एइमल खान, अदनान खान र माझर अली टोलीमा रहेका छन् ।

हेल्प नेपालले घरेलु भलिबलमा नाम चलेका अमृत केसी, सुरेन्द्र वाम, धिरज बस्नेत र सन्तोष महतालाई पनि टोलीमा समेटेको छ । यसबाहेक विष्णु बस्नेत, मनोज श्रेष्ठ र भरत कुमार विक पनि अन्तिम टोलीमा छन् ।

टोलीको प्रशिक्षकमा उत्सव खड्का नियमित छन् । सहायक प्रशिक्षकमा जितबहादुर केसी तथा व्यवस्थापकमा झम्क नारायण श्रेष्ठ रहेका छन् ।

प्रतियोगिता असार २३ देखि ३० गतेसम्म दशरथ रंगशालाको कभर्ड हलमा हुँदैछ । प्रतियोगिताको सम्पुर्ण खेल हाम्रो खेलकुदको मोबाइल एपमार्फत हेर्न सकिनेछ ।

लामो समयदेखि टोलीलाई मुख्य प्रयोजन गर्दै आएको टिप टपले यसपटक पनि टोलीलाई निरन्तर सहयोग गरेको छ । टिप टपले वार्षिक २५ लाखको प्रायोजन गरेको छ । यसबाहेक नेकेड एक्सप्रेसले टोलीको सम्पूर्ण खेल पोसाक प्रायोजन गरेको छ । संस्थाले सम्पूर्ण खेलाडी र अफिसियललाई ट्रयाकसुट र जर्सी उपलब्ध गराएको हो ।

हेल्प नेपाललाई होटेल मिस्टिक माउन्टेन, हार्भेस्ट मुन र देविवास सेभिङ एण्ड क्रेडिट को-ओपरेटिभले पनि नगद १-१ लाखको सहयोग गरेका छन् ।

क्लबले यस प्रतियोगिताका लागि झन्डै २० लाख रुपैयाँ खर्च हुने अनुमान गरेको छ । प्रायोजकबाट आएकोबाट अपुग रकम क्लबका सदस्यहरुबाट उठाइने महासचिव अरुण श्रेष्ठले जानकारी दिए ।