काठमाडौं (हाम्रो खेलकुद) – खेलकुद पोशाक उत्पादन गर्ने बहुराष्ट्रिय कम्पनि केल्मीको नक्कली सामग्री उत्पादन तथा वितरण गर्ने तीन जनालाई प्रहरीले पक्राउ गरेको छ ।

नेपाली खेलकुद क्षेत्रमा निकै आक्रामक बजार भएको केल्मीको नक्कली सामाग्री निर्माण तथा विक्री गर्ने तीन व्यक्तिलाई आइतबार फरक फरक ठाउँबाट पक्राउ गरिएको हो । पोखरास्थित ज्याकेट हाउसबाट ५ सय प्रति पोशाक सहित त्यस संस्थाका मालिकलाई प्रहरीले पक्राउ गरेको हो । हाल उनलाई बैदाम प्रहरीले हिरासतमा राखेको छ ।

त्यस्तै काठमाडौंबाट पनि दुई जनालाई पक्राउ गरिएको छ । एसकेसी गार्मेन्ट, भोटाहिटी र सुजन सिर्जना शिभम रेडिमेड स्टोर, महाबौद्धबाट पनि १२०० पिस सामाग्री सहित दुई जना पक्राउ परेका छन् । पक्राउ पर्नेमा दुवै संस्थाका मालिक र सामाग्री निर्माण गर्ने मेसिसहित एक भारतीय नागरिक छन् ।

नेपालमा केल्मीको अधिकारिक विक्रेता तथा वितरक कामरु ट्रेडिङ प्रालिले आधिकारिक केल्मीको स्टोरबाट मात्र सक्कली सामग्री खरिद गर्न आग्रह गरेको छ । केल्मीले नेपाली खेलकुदमा राष्ट्रिय क्रिकेट टोली, राष्ट्रिय भलिबल टोली, ए डिभिजन फुटबल क्लब लगायत विभिन्न टोलीलाई प्रायोजन गर्दै आएको छ ।

केल्मीले ग्राहकहरुको सहजताका लागि नेपालभर आफ्नो आउटलेट खोलेको छ । दरवारमार्गमा मुख्य स्टोर रहेको केल्मीले देशभर २० ओटा आउटलेट खोलेको छ । राजधानीमा ७ ओटा र देशका मुख्य सहरमा केल्मीका १३ स्टोर रहेका छन् ।