काठमाडौं (हाम्रो खेलकुद) – नेपालले पहिलो एकदिवसीय अभ्यास खेलमा स्कटल्यान्डविरुद्ध खराब सुरुवात गरेको छ । टस हारेर पहिला ब्याटिङको निम्तो पाएको नेपालले १३.२ ओभरमा ४ विकेट गुमाउँदै ५८ रन बनाएको छ ।

नेपालका ओपनर आसिफ शेख ३६ बलमा २८ रन बनाउँदै आउट भएका छन् । अर्का ओपनर कुशल भुर्तेल २४ बलमा २ चौकासहित १६ रन बनाउँदै क्याच आउट भएका थिए । कुशल तीव्र गतिका बलर शफ्यान शरिफको बलमा स्लिपमा जर्ज मुन्शेबाट क्याच आउट हुन पुगेका थिए ।

नेपालका ओपनरले सुरुवातमा केहि संयमित सुरुवात दिलाएका थिए । तेस्रो नम्बरमा आएका भीम सार्की ८ रनमा क्याच आउट भएका छन् । भीम जर्ज मुन्शेबाट नै क्याच आउट भएका हुन् । भीम एड्रियन निलको बलमा क्याच आउट हुन पुगेका हुन् ।

१४ औं ओभरको पहिलो बलमा ज्याक जार्विसले आसिफलाई बोल्ड आउट गरे । लगत्तै अर्को बलमा कप्तान रोहित पौडेल गोल्डेन डक आउट भएका छन् । रोहित गोल्डेन आउट भएसँगै नेपाल संकटमा परेको छ । नेपालको क्रिजमा अहिले ज्ञानेन्द्र र कुशल मल्ल रहेका छन् ।

नेपालले दुई सातापछि जिम्बावेमा हुने आइसिसी एकदिवसीय विश्वकप छनोट अघि दक्षिण अफ्रिकामा अन्तिम तयारी गर्दैछ । नेपालले दक्षिण अफ्रिकामा दुई अभ्यास खेल खेल्न लागेको हो । नेपालले शनिबार नेदरल्यान्ड्ससँग अभ्यास खेल खेल्नेछ ।