काठमाडौं (हाम्रो खेलकुद) – काजकस्तानले एनएससी काभा महिला भलिबल च्यालेन्ज कपअन्तर्गत समूह चरणको अन्तिम खेलमा उज्वेकिस्तानलाई ३-१ ले पराजित गर्दै समूह बी को विजेता बनेको छ ।

त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा भएको खेलमा काजकस्तानले उज्वेकिस्तानलाई २६(२४, २५-१६, २५-११ र २५-१८ ले हराउँदै समूह विजेता बनेको हो ।

पहिलो सेट निकै प्रतिस्पर्धात्मक बनेको थियो । तर सेट प्वाइन्टमा सर्भिसमा गल्ती गरेपछि काजकस्तानले पहिलो सेट गुमाएको थियो । तर दोस्रो र तेस्रो सेटमा भने काजकस्तानले पुरै फरक प्रदर्शन गर्यो । चौथो सेटमा भने सुरुवातमा दुबै टोलीले निकै प्रतिस्पर्धा गरेका थिए । एक समय ११-११ को बराबरी अवस्थाबाट लगातार ८ अंक बटुलेपछि काजकस्तानले जितको आधार तय गरेको थियो ।

काजकस्तानले अव समूह ए को उपविजेतासँग खेल्नेछ । समूह ए मा आज दिउँसो तीन बजेबाट सुरु हुने नेपाल र भारतबीचको खेलले समूह ए को विजेता र उपविजेता निर्धारण गर्नेछ । समूह बी को उपविजेता उज्वेकिस्तानले समूह ए को विजेतासँग खेल्नेछ ।

समूह बी मा काजकस्तान ३ खेलमा ९ अंकका साथ शीर्ष स्थानमा रह्यो । उज्वेकिस्तान ३ खेलमा २ मा जित र १ मा हारसहित ६ अंकका साथ दोस्रो स्थानमा रह्यो । श्रीलंका र माल्दिभ्स भने जित विहीन हुँदै तेस्रो र चौथो स्थानमा रहेर बाहिरिए ।

समूह ए मा भारत २ खेलमा ६ अंकका साथ शीर्षस्थानमा छ । नेपाल २ खेलमा ६ अंक भएपनि सेटका कारण दोस्रो स्थानमा छ । कीर्गिस्तान ३ खेलमा १ मा जित र २ मा हारका साथ तेस्रो स्थानमा छ । बंगलादेश ३ खेलमा जित विहीन हुँदै पुछारमा रहेर बाहिरियो ।