काठमाडौं (हाम्रो खेलकुद) – सूर्य नेपाल गल्फ टुर २०२२-२३ को सातौं इभेन्ट सूर्य नेपाल एनपिजीए टुर च्याम्पियन्सिप गोकर्ण गल्फ क्लबमा सोमबारदेखि सुरु हुँदैछ ।

चार दिन चल्ने प्रतियोगितामा ७२ होलमा प्रतिस्पर्धा हुनेछ । प्रतियोगितामा ३२ व्यवासायिक गल्फर र ८ एमेच्योरलेे सहभागिता जनाउने छन् । सुरुवाती ३६ होलपछि शीर्ष २१ प्रो र शीर्ष ६ एमेच्योरले कट बनाउने छन् ।

प्रतियोगिताको कुल पुरस्कार रकम ८ लाख रुपैयाँ रहेको छ । उपाधि विजेताले १ लाख ४० हजार रुपैयाँ प्राप्त गर्नेछन् । उपविजेताले ९० हजार तथा तेस्रो ६७ हजार रुपैयाँमा चित्त बुझाउनेछन् । शीर्ष २१ प्रो खेलाडीले पुरस्कार प्राप्त गर्नेछन् ।

व्यावसायिक गल्फर भुवन नगरकोटी, जयराम श्रेष्ठ र धनबहादुर थापालाई यसपटक एमेच्योर गल्फरद्वय सद्भाव आचार्य र सुभाष तामाङले उपाधिका लागि कडा चुनौती प्रस्तुत गर्ने अनुमान छ । सद्भाव पछिल्लो इभेन्टमा च्याम्पियन बनेका थिए । नेपाल नम्बर १ शुक्रबहादुर राई भारतको व्यवासायिक टुरमा व्यस्त रहेकाले यसमा खेल्ने छैनन् ।

एमेच्योर गल्फरका लागि भने यो प्रतियोगिता विश्व वरीयतामा पनि प्रभाव पार्नेछ । एनपिजीएका महासचिव दिपक आचार्यका अनुसार टुरको अन्तिम दुई इभेन्ट एमेच्योरको विश्व वरीयतामा समावेश भएको बताए । यसबाहेक नेपाल गल्फ संघले विश्व वरीयतालाई ध्यानमा राख्दै टुरको समाप्तिपछि एमेच्योर प्रतियोगिता आयोजना गर्ने पनि उनले जानकारी दिए ।

एनपिजीएका अध्यक्ष रविन्द्र मान श्रेष्ठले व्यावसायिक गल्फरलाई एमेच्योरले चुनौती दिनुले गल्फ विकासका सहयोग पुगेको बताए । उनले सूर्य नेपाल प्रालिलाई निरन्तर प्रायोजनका लागि धन्यवाद व्यक्त गरे ।