रग्बी लिगको उपाधि भिडन्तमा आर्मी र गोर्खाली

काठमाडौं (हाम्रो खेलकुद) – राष्ट्रिय क्लब रग्बी फिफ्टिन्स लिगको उपाधिका लागि शनिबार त्रिभुवन आर्मी क्लब र गोर्खाली रग्बी फुटबल क्लब भिड्ने भएका छन् । खेल दशरथ रंगशालामा साँझ ५:३० बजे हुनेछ ।

अंक तालिकाको शीर्ष दुई स्थानमा रहेका आर्मी र गोर्खालीले लिगको अन्तिम खेल खेल्दा उपाधिको छिनोफानो पनि त्यसै नतिजाबाट हुनेछ । दुवै टोलीले सुरुवाती दुई खेलमा फराकिलो जित दर्ता गरेका हुन् । २ खेलमा समान १० अंक जोडेपनि अंक अन्तरका आधारमा आर्मी शीर्षस्थानमा छ ।

पहिलो खेलमा आर्मीले आकाश भैरवलाई ७२–० को फराकिलो अन्तरले हराएको थियो । त्यस्तै गोर्खालीले हिमालयन टाइगरलाई ६७–१७ को अन्तरले पराजित गरेको थियो ।

त्यसपछि दोस्रो चरणमा आर्मीले हिमालयन रग्बी क्लबलाई ७५–१० को अन्तरले पराजित गर्दा गोर्खालीले आकाश भैरवलाई ७६–३ ले हराएको थियो ।

हिमालयन र आकाश भैरव दुवै जित विहिन र अंकविहिन छन् । आकाश भैरवले हालसम्म ओपन प्लेमा अंक जोड्न सकेको छैन ।