काठमाडौं (हाम्रो खेलकुद)– बंगलादेशमा एभिसी सेन्ट्रल जोन बीच भबिल प्रतियोगितामा रजत पदक जितेर फर्केको पुरुष जोडीका कप्तान मानबहादुर श्रेष्ठले देशवासीलाई समपर्ण गरेका छन् ।

फाइनल खेलेको भोली पल्ट शनिबार स्वदेश फर्केपछि मानले भने, ‘तयारी एकदमै छोटो थियो । यो छोटो अवधिमा पनि संघले बीच भलिबलको पुर्वाधार तयार गरेर प्रशिक्षण गराएको छ । तर, त्यहाँ (कक्स) बजारको बिच र यहाँको बिचमा धेरै फरक थियो । हामीले धेरै अनुभव गर्ने मौका पायौं ’ दिल सुनारसँग मिलेर पदक जितेका मानले भने, ‘यो जित हामी देशवासलाई समपर्ण गर्न चाहन्छौं ।’

नेपालको महिला र पुरुष दुवै टोलीले प्रतियोगितामा रजत पदक जितेको थियो । महिला जोडीकी कप्तान कोपिला उप्रेतीले भावुक हुँदै नेपालको राष्ट्रिय टोलीबाट इन्डोर खेलमा पाउन नसकेको सफलता बीच भलिबलबाट पाउँदा बोल्ने कुनै शब्द नरहेको बताइन् । łपदक नेपालीलाई समर्पण गर्न चाहन्छौ. । मैले लामो समय इन्डोर खेलमा खेले । त्यहाँबाट यतिको सफलता दिलाउन पाएकी थिइन् । बीच भलिबलबाट यो ऐतिहासिक रजत पदक जित्दा बोल्ने कुनै शब्द छैन ।’ कमला पुनसँग मिलेर पदक जितेकी कोपिलाले भनिन् ।

उनले थपिन् ‘हामीले पर्याप्त पुर्वाधारविना नै यो ऐतिहासिक पदक जित्न सफल भएका छौं । पर्याप्त पुर्वाधार र नियमित प्रशिक्षण हुन सके स्वर्णपदक नै जित्न सक्ने क्षमता नेपाली खेलाडीमा छ । यसमा संघ र सरकारलाई ध्यानाकर्षण गराउन चाहान्छु ।’

टोलीका प्रशिक्षक भरत शाहले पनि आफ्नो समयमा बीच भलिबलमा थुप्रै राष्ट्रिय तथा अन्तर्राष्ट्रिय जितेपनि फिभ र एभीसीबाट मान्यता प्राप्त यति ठुलो प्रतियोगिता जित्न नसकेको यसपल्ट प्रशिक्षकको रुपमा यो रजत जित्दा एकदमै खुसी लागेको बताए । ‘मैले खेलाडीको रुपमा बीच भलिबल धेरै खेले । तर, यति ठुलो उपाधि जित्न सकेको थिएन । फिभ र एभीसीबाट मान्यता प्राप्त यो रजत नै नेपालले बिच भलिबलका पाएको ठुलो सफलता हो ।’

शाह भने, ‘खेलाडी र प्रशिक्षकको रुपमा पहिलोपटक यति ठूलो सफलता पाएको छु । पुर्वाधारविना नै खेलाडीले कक्सबजारमा उच्च मिहेनतका साथ खेले । रजत पदक जित्दाको हिस्सा बन्न पाउँदा खुशी छ ।’

नेपाल भलिबल संघका अध्यक्ष जितेन्द्र बहादर चन्दले छोटो समयमा बावजुत खेलाडीले गरेको मिहेनतका कारण यो सफलता हात पारेको बताउँदै संघले टोलीलाई जनही २५ हजार रुपैया प्रदान गर्ने घोषणा गरेको छ । यस्तै अध्यक्ष चन्दले इन्डोर हलसँगै बिच भलिबलको लागि पनि सरकारलाई झकझक्याई रहने बताए । यस्तै राष्ट्रिय खेलकुद परिषद (राखेप) सरकारले प्रदान गर्ने भनिएको पुरस्कारको लागि पनि पहल गरिने बताए ।

बिहीबार भएको महिलातर्फको फाइनलमा नेपाल पुलिस क्लबका कोपिला र कमलाको जाडी श्रीलंकाकी चथुरिका र दीपिकाको जोडीसँग २–० ले पराजित भएको थियो । शनिबार भएको पुरुषतर्फको फाइनलमा नेपाली सेनाका मानबहादुर र दिलको जोडी माल्दिभ्सका एडाम नासिम र स्लेमको जोडीसँग २–० ले नै पराजित भएको थियो ।

महिलातर्फ बंगलादेश र उज्वेकिस्तानको समान दुई टोली तथा नेपाल र श्रीलंकाको समान एक टोली गरी कुल ६ टोलीको सहभागिता रहेको थियो । पुरुषतर्फ आयोजक नेपालसहित माल्दिभ्स, आयोजक बंगलादेश, कीर्गिस्तान र भुटानको सहभागिता रहेको थियो । प्रतियोगितालाई एफआईभिबीले मान्यता दिएको थियो ।