काठमाडौं (हाम्रो खेलकुद)– बंगलादेशमा एभिसी सेन्ट्रल जोन भलिबल च्याम्पियनसिपमा भाग लिएर नेपाली राष्ट्रिय भलिबल टोली बुधबार दिउँसो स्वदेश फर्कदैछ । च्याम्पियनसिपमा लगातार दोस्रो पटक चौथो हुँदै टोली फर्कन लागेको छ । तेस्रो स्थानका लागि माल्दिभ्ससँग मंगलबार भएको प्रतिस्पर्धा ३–१ ले गुमएपछि भएपछि नेपाल पदक विहिन भएको थियो ।

आयोजक बंगलादेश सेन्ट्रल जोन च्याम्पियन बन्यो भने किर्गिस्तान दोस्रो भएको छ । माल्दिभ्सलाई लिगमा ३–१ ले हराएको नेपाल दोस्रो खेलमा बंगलादेशसँग सोझो ३ सेटमा पराजित भएको थियो । अघिल्लो बर्ष तेस्रो स्थानमा अफगानिस्तानसँग पराजित नेपालले यसपटक त्यहि टोलीमाथि ३–२ को जित निकालेको थियो ।

किर्गिस्तानसँग पनि नेपाली टोली पराजित भएपछि तेस्रो पदकका लागि भिड्ने मौका पाएको थियो । जहाँ नेपाल फेरी एक पटक चुक्न पुग्यो । पदक विहिन भएर फर्कनु पर्दा दुःख लागेको जनाउँदै नेपाली टोलीका प्रशिक्षक जगदिश भट्टले टोलीको प्रदर्शनमा अझै सुधारको आवश्यकता रहेको र त्यसका लागि नियमित प्रशिक्षण हुनुपर्ने बताएका छन् ।

नेपाल भलिबल संघका सचिव समेत रहेको भट्ट सरकारले खेल क्षेत्रमा पर्याप्त लगानी नगर्दा सम्म अपेक्षा अनुसारको सफलता पाउन नसक्ने बताउँछन् । संघका अध्यक्ष मनोरञ्जनरमण शर्मा, महासचिव जितेन्द्रबहादुर चन्द, १२ खेलाडीसहित १८ सदस्यीय टोली दिउँसो त्रिभुवन विमानस्थलमा ओर्लनेछन् ।