काठमाडौं (हाम्रो खेलकुद)– बंगलादेशमा जारी बंगबन्धु एभिसी सेन्ट्रल जोन भलिबल च्याम्पियनसिपको फाइनल पुग्न नेपालका लागि किर्गिस्ताविरुद्ध सोमबार हुने खेलमा महत्वपूर्ण छ । अपराजित रहेको किर्गिस्तान च्याम्पियनको दाबेदार टोली हो ।

नेपालले तीनमध्ये दुई खेल जित्दै फाइनल प्रवेशको सम्भावनालाई जीवित राखेको छ । सँगै आयोजक बंगादेश फाइनलको अर्को शसक्त दाबेदार टोली हो । आज हुने दुई खेलले फाइनल पुग्ने टोलीको टुंगो लाग्नेछ । फाइनल पुग्नका लागि नेपालसँग जितको विकल्प छैन ।किर्गिस्तान भने नेपालसँग पराजित भएपनि अन्तिम दुईमा पुग्ने सम्भावन रहन्छ । तर, नेपालको हकमा भने किर्गिस्तानलाई हराएर मात्र पुग्ने छैन, अर्को खेलको नतिजा कुर्नु पर्ने हुन्छ । दोस्रो स्थानको बंगलादेश र माल्दिभ्सबीचको खेल आफु अनुकुल आउँदा मात्र नेपाल अघि बढ्ने सम्भावना रहन्छ ।

नेपालले किर्गिस्तानलाई हराउने र बंगलादेशलाई माल्दिभ्सले पराजित गरेको अवस्थामा मात्र नेपाल फाइनल पुग्नेछ । किर्गिस्तानसँग नेपाल हारेमा बंगलादेश अन्तिम खेलअघि नै फाइनल पुग्नेछ । पराजित भएमा नेपालले माल्दिभ्ससँग तेस्रो स्थानका लागि प्रतिस्पर्धा गर्नेछ ।

किर्गिस्तान ३ जितबाट ८ अंक बटुलेको छ । दुई खेलमा समान ३ अंक जोडेको किर्गिस्तानले एउटा खेल बेस्ट अफ फाइभमा जितेका कारण २ अंक मात्र प्राप्त गरेको छ । नेपालले ३ खेलबाट २ मा जितबाट ५ अंकमात्र बटुलेको छ । पहिलो खेल सोझो सेटमा जितेको नेपालले अफगानिस्तानलाई बेस्ट अफ फाइनमा पुगेर हरायो जसका कारण टोलीले २ अंक पाएको छ । २ मा जित र १ मा हारका वावजुद बंगलादेश अंक जोडेको छ ।

दुई खेलमा सोझो सेटमा जितेको बंगलादेशले अर्को खेल वेस्ट अफ फाइभमा पुगेर हारेको थियो । त्यसको टोलीले १ अंक पाएको थियो । माल्दिभ्सको ३ अंक छ । नेपालसँग वेस्ट अफ फाइभमा हारेको अफगानिस्तानले १ अंक जोडेको थियो । अफगानिस्तान प्रतियोगितबाट बाहिरिसकेको छ ।

सेन्ट्रल जोन भलिबल च्याम्पियनसिपमा सोमबारको खेल नेपालविरुद्ध किर्गिस्तान (स्थानिय समयअनुसार दिउँसो ३ बजे) बंगलादेशविरुद्ध माल्दिभ्स (स्थानिय समयअनुसार साँझ ५ बजे )