काठमाडौं (हाम्रो खेलकुद) – नेपाली टोली द रियल सोल्जर्स (डीआरएस) गेमिङले विश्व प्रसिद्ध मोबाइल खेल प्लेयर ब्याटल अन्डरग्राउन्ड्स (पब्जी) को ग्लोबल च्याम्पियनसिप (पिएमजिसी) मा प्रतिस्पर्ध गर्दैछ । आइतबार हुने समूह चरणको अन्तिम दिन डीआरएस शीर्ष ३ मा स्थान बनाउँदै अन्तिम चरणका लागि छनोट हुने लक्ष्यमा छ ।

समूह रातोमा परेको डीआरएस तेस्रो दिनको खेल सकिँदा १ सय ६३ अंक जोड्दै पाँचौ स्थानमा छ । पहिलो दिन ४८ अंक जोड्दै औसत सुरुवात गरेको डीआरएसले दोस्रो दिन १२ औं राउन्डमा चिकेन डिनरसहित ६७ अंकको सानदार प्रदर्शन गर्यो । तेस्रो दिन डीआरएसले औसत प्रदर्शनसाथ ४८ अंक नै जोड्यो ।

हाल समूह रातोको अंक तालिकामामा ब्राजिलको इन्फ्लुएन्स केमिन २ सय ३५ अंकसहित शीर्षस्थानमा छ । थाइल्याण्डको बुरिराम युनाइटेड २ सय ३३ अंक जोड्दै दोस्रो स्थानमा छ । यी दुईले शीर्ष २ स्थान हासिल गर्न लगभग पक्का देखिन्छ ।

तेस्रो स्थानका लागि चीनको एलजीडी गेमिङ्ग (१८१), टर्कीको एसटुजी ईस्पोर्ट्स (१७५) र डीआरएस (१६३) बीच प्रतिस्पर्धा हुने देखिन्छ । डीआरएस शीर्ष ११ मा ५३ अंकको अग्रतामा रहेकाले अर्को चरण पुग्ने लगभग पक्का भइसकेको छ । टोली शीर्ष ३ मा रहेर सिधै अन्तिम चरण पुग्न चाहन्छ ।

४ दिन संचालन हुने समूह चरणमा कुल २४ राउन्ड खेल हुनेछ । आइतबार अन्तिम दिन अन्तिम ६ राउन्डबाट समूहको अन्तिम स्थान टुंगो लाग्नेछ । मलेसियाको कुआलालम्पुरमा भइरहेको समूह चरणबाट शीर्ष तीन टोलीले सिधै अन्तिम चरणमा स्थान बनाउने छन् । अन्तिम चरण अर्को वर्ष जनवरीमा जकार्तामा हुनेछ ।

त्यस्तै हरेक समूहबाट चौथो देखि ११ औं स्थान हासिल गर्ने टोलीले सर्भाइभल स्टेज खेल्दै फाइनल पुग्ने अर्को अवसर पाउनेछन् । हरेक समूहका पुछारका ५ टोली भने बाहिरिनेछन् । सहभागी ४८ टोलीलाई रातो, हरियो र निलो समूहमा विभाजन गरिएको छ । नेपालबाट स्काइलाइट्ज गेमिङ हरियो समूह र ट्रेन्ड टु किल (टि२के) पहेंलो समूहमा रहेका छन् । स्काइलाइट्ज शनिबार मलेसिया प्रस्थान गरिसकेको छ ।