काठमाडौं (हाम्रो खलकुद) – बंगलादेशको ढाकामा जारी बंगबन्धु एसियाली सेन्ट्रल जोन भलिबल च्याम्पियनसिपको उपाधिको सम्भावना कायम राख्न नेपालका लागि शनिबारको खेलको नतिजा महत्वपूर्ण हुनेछ । नेपालले आज बंगलादेशको स्थानिय समय अनुसार दिउँसो ४ बजे अफगानिस्तानसँग प्रतिस्पर्धा गर्नेछ ।

पहिलो खेलमा माल्दिभ्सलाई ३–१ ले हराएको नेपाल शुक्रबार आयोजक बंगलादेशसँगको खेल ३–० ले गुमाएको थियो । माल्दिभ्सलाई २६–२४,१५–२५,२५–१९ र २६–२४ ले हराएको नेपालले बंगलादेशको खेल २५–२१,२५–२० र २५–२३ ले गुमाएको थियो ।
नेपाली टोलीका प्रशिक्षक जगदिश भट्टले अफगानिस्तानलाई हराउन हरसम्भव प्रयास गर्ने बताएका छन् । गत बर्ष यहि च्याम्पियनसिपमा नेपालले अफगानिस्तानलाई हराएको थियो । ‘अफगानिस्तान पहिला भन्दा बलियो भएको छ । यो च्याम्पियनसिपका लागि इरानमा तयारी गरेर फर्केको छ’ भट्टले भने,‘तर हामी पुनः जितमा फर्कनका लागि प्रयास गर्नेछौं । प्रतियोगितामा अघि बढ्नका लागि पनि यो खेल महत्वपूर्ण छ ।’ अफगानिस्तानले अघिल्ला दुवै खेल गुमाइसकेको छ ।

च्याम्पियनसिपमा नेपाल, माल्दिभ्ससहित सहित किर्गिस्तान, अफगानिस्तान र आयोजक बंगलादेशको सहभागिता छ । लिग कम नकआउटपछि समूहका शीर्ष दुई टोलीले फाइनलमा प्रतिस्पर्धा गर्ने छन् । तेस्रो र चौथो टोलीबीच कास्य पदकका लागि प्रतिस्पर्धा गर्नेछन् । इम रानाको कप्तानीमा रहेको नेपालीमा हरिहजुर थापा, मानबहादुर श्रेष्ठ, धनबहादुर भट्ट, विजय थापा,कुलबहादुर थापा, महेन्द्र श्रेष्ठ, भैरवबहादुर बम,भुवन कार्की, नरेन्द्र गिरी, देव शर्मा र इश्वर थापा छन् ।