दिपेन्द्र पोखरेल

विराटनगर– सातौं राष्ट्रिय खेलकुदको औपचारिक सुरुवात भएको पहिलो दिन शुक्रबार सशस्त्र प्रहरी बल (एपिएफ) का लागि सुखद रह्यो । क्रिकेट र फुटबल दुवै खेलमा एपिएफले दोहोरो जित हासिल गरेको छ । चारै खेलमा एपिएफले शतप्रतिशत नतिजा हात निकालेको हो ।

महिला फुटबल

महिला फुटबल अन्तर्गतको खेलमा बिभागिय डर्बीमा एपिएफले त्रिभुवन आर्मी क्लब लाई ३–०ले पाखा लगाउदै प्रतियोगितको फाइनल प्रवेश गर्यो ।

महिला क्रिकेट

महिला क्रिकेटमा एपिएफले मध्यमाञ्चललाई ६१ रनले हरायो । टस जितेर पहिलो ब्याटिङ गरेको एपिएफले निर्धारित २० ओभरमा ३ विकेट गुमाउदै १ सय १५ रन जोडेको थियो । एपिएफको लागि सरिता मगरले ४३ रन र बिनु बुढा मगरले ३३ रन बनाइन् । जवाफमा मध्यमाञ्चलले ५४ रन बनाउदै सबै विकेट गुमायो । एपिएफको लागी सोनु खड्काले ३ र करुण भण्डारिले २ विकेट लिए ।
दोस्रो खेलमा आयोजक पूर्वाञ्चलले पश्चिमाञ्चललाई ६६ रनले पराजित गर्यो । टस जितेर पहिले ब्याटिङ गरेको पूर्वाञ्चलले निर्धारित २० ओभरमा ४ विकेटको क्षतिमा १ सय ४ रन बनायो । रोमा थापाले ५२ र रश्मी चौलागाइले २० रन जोडे ।

पुरुष फुटबल
धरान स्थित एन्फा टेक्निकल सेन्टरमा भएको पुरुष फुटबलमा समुह ‘ख’को खेलमा एपिएफले मध्य पश्चिमाञ्चललाई ८–० ले हरायो । एपिएफका लागी युवराज खड्काले ४ गोल गरे ।

पुरुष क्रिकेट
पुरुष क्रिकेट अन्तर्गतको खेलमा राष्ट्रिय टोलिका स्टार खेलाडीले भरिपुर्ण एपिएफले मध्य पश्चिमाञ्चलाई २६ रनले पराजित गरेको थियो ।

सातौ राष्ट्रिय खेलकुदको औपचारिक सुरुवात भएको भोली दोस्रो दिन शनिबार एथ्लेटिक्सका खेलहरु हुँदै छ । पाँच विकास क्षेत्र र तीन विभागिय गरि ८ टोलीले राष्ट्रिय खेलकुदमा प्रतिस्पर्धा गरिरहेका छन् ।