काठमाडौं (हाम्रो खेलकुद)– खेलाडी र प्रशिक्षकका रुपमा दुई दशक भन्दा बढी समय भलिबलमा बिताइसकेका जगदिश भट्टका लागि बिहीबार विशेष दिन थियो । प्रशिक्षकका रुपमा भट्टका लागि बिहीबार सबैभन्दा खुसीको दिन थियो । बंगबन्धु एसियाली सेन्ट्रल जोन भलिबल च्याम्पियनसिपको पहिलो खेलमा नेपालले माल्दिभ्सलाई ३–१ ले हराएको थियो ।

पटक पटक राष्ट्रिय टोलीको सहयाक प्रशिक्षक रहिसकेका ४३ बर्षे भट्टले यसपटक मुख्य प्रशिक्षकको जिम्मेवारी लिदै बंगलादेश पुगेका थिए । उनको लागि मुख्य प्रशिक्षक जति चुनौतिपूर्ण जिम्मेवारी थियो त्यति नै अवसर पनि । च्याम्पियनसिपमा नेपालको यात्रा कहाँ सम्म पुग्छ अहिले भन्ने अवस्था छैन, तर एउटा प्रशिक्षकका रुपमा जितबाट च्याम्पिनसिपको यात्रा प्रारम्भ गर्नु टोली र भट्टका लागि विशेष थियो ।

माल्दिभ्सलाई २६–२४,१५–२५,२५–१९ र २६–२४ ले हराउँदा टोलीले निकै चतुर्याइपूर्वक खेलेको भट्ट बताउँछन् । पूर्व राष्ट्रिय खेलाडी उनले भने, ‘’माल्दिभ्स बलियो टोली हो । त्यस्तो टोलीलाई हराउन सहज थिएन । म धेरै खुसी छु ।’ मुख्य प्रशिक्षकका रुपमा टोलीको पहिलो खेलअघि दबाब भन्दा पनि बढी उत्साहित रहेको अनुभव सुनाए । ‘दबाब त हुन्छ नै । खेल जीवनमा पनि त्यस्ता धेरै दबाबका बीच खेलियो’ उनले सुनाए,‘तर यसपटक पहिलो पटक मुख्य प्रशिक्षकको जिम्मेवारीमा म दबाबमा भन्दा बढी उत्साहित थिए । सुरुआत राम्रै भएको छ ।’

उनले नेपाली टोली अ‍ेपक्षा भन्दा निकै स्तरीय प्रदर्शन गरेको बताए । उनले थपे ‘सबै खेलाडीले सतप्रतिसत दिएर खेले । त्यसै कारण सफलता पनि मिल्यो । टिम इफोर्टनै जितको मुख्य कारण हो ।’नेपालले शुक्रबार आयोजक बंगलादेशसँग खेल्नेछ । बंगलादेशले पहिलो खेलमा अफगानिस्तानलाई ३–१ ले हराएको थियो ।