काठमाडौं (हाम्रो खेलकुद) – नेपाली महिला राष्ट्रिय फुटबल टोलीले शुक्रबार दशरथ रंगशालामा साविक विजेता भारतलाई हराउँदै महिला साफ च्याम्पियनसिपको फाइनलमा स्थान पक्का गर्यो । खेलमा झन्डै साढे ७ हजार दर्शकको उपस्थिति रहेको थियो ।

खेलको वार्मअप देखिनै समर्थकले नेपाली टोलीलाई साथ दिएका थिए । खेलपछि नेपाली टोलीका प्रशिक्षक कुमार थापाले समर्थनको प्रशंसा गर्दै दर्शकहरुलाई धन्यवाद दिन उपाधि घरमा राख्ने बताएका थिए । तर खेल हेर्न आउने समर्थकको एक समूहले एक ब्यानर प्रस्तुत गरेको थियो । ब्यानरमा लेखिएको थियो, ‘सन्दीप भाइ कता हो?’

नेपाली राष्ट्रिय क्रिकेट टोलीका कप्तान रहेका सन्दीप यतिबेला बलात्कार आरोपमा फरार रहेका छन् । नेपाल प्रहरीले उनीमाथि बलात्कार आरोप लागेपछि पक्राउ पुर्जी जारी गरेको छ । सन्दीप आफैंले पक्राउ पुर्जी जारी भएपछि आफू निर्दोष रहेको र अनुसन्धानमा सघाउने सार्वजनिक रुपमा बताएका थिए । तर पछिल्लो समय भने उनी सम्पर्कविहिन रहेको बताइएको छ ।

नेपाल क्रिकेट संघ (क्यान) ले पक्राउ पुर्जी जारी भएपछि उनलाई राष्ट्रिय टोलीबाट निलम्बन गरिसकेको छ । उनी क्यारेबियन प्रिमियर लिग (सिपिएल) खेल्न सेन्ट लुसिया पुगेपनि फ्रेन्चाइजले उनलाई फुकुवा गरिसकेको छ । तर उनको पछिल्लो अवस्थाबारे क्यान र प्रहरी नै अनभिज्ञ छ । त्यसैले पनि समर्थकले फुटबल मैदानबाटै भएपनि उनीबारे चासो राखेका हुनुपर्छ ।

यो पनि :

नेपालले हराएपछि भारत पहिलो पटक फाइनल पुग्न सकेन