काठमाडौं (हाम्रो खेलकुद)– व्यवसायिक गल्फर बलभद्र (मणी) राईको नेतृत्वमा रहेको टोलीले सूर्य नेपाल इस्टर्न ओपन प्रो–एम स्पर्धाको उपाधि जितेको छ । धरानको निर्भाना कन्ट्री क्लब हेल्थ एन्ड गल्फ रिसोर्ट स्थित पार ७० को कोर्षमा बिहीबार भएको प्रतिस्पर्धामा मणीसहित एमेच्योर गल्फर शेखर लिम्बु, बिएम सुनुवार र रोहीत आचार्यको टोलीले १ सय ५३ स्कोरका साथ उपाधि जितेको हो । मणीले ३७, शेखरले ४० र बिएम र रोहितले समान ३८ स्कोर गरेका थिए ।

अर्का व्यवसायिक गल्फर धनबहादुर थापा को नेतृत्वमा उत्तम राई, सुरेश श्रेष्ठ र ध्रुब थापा रहेको टोली १ सय ४७ स्कोरको साथ दोस्रो स्थान प्राप्त गर्यो । धनबहादुरले ३६ र बाँकी तीनै जनाले ३७ स्कोर गरेका थिए । बुधबार इस्टर्न ओपन ओपन उपाधि जितेका नम्बर एक व्यवसायिक गल्फर शिवराम श्रेष्ठसहित एमेच्योर सन्तोष कार्की, रितेश तामाङ र रुपेन्द्र गुरुङको टोली १ सय ४४ स्कोर गर्दै तेस्रो भयो । टोलीका सबैले समान ३६ स्कोर गरेका थिए ।

बेस्ट इन्डिभिज्युलको उपाधि पुरुषतर्फ शेखर र महिला तर्फ शुसिला राई (१५) ले प्राप्त गरे । दलबहादुर लामाले क्लोजेस्ट टु दि पिन र नेपाल गल्फ संघका महासचिव टासी घलेले लंगेस्ट ड्राइभ उपाधि जिते । स्टेबल फोर्ड फुल ह्यान्डिक्याप पद्धतीमा भएको प्रतियोगितामा १५ व्यवसायिकसहित ६० खेलाडीको सहभागिता रहेको थियो ।

व्यवसायिकतर्फ सबैभन्दा बढी स्कोर गर्ने र एमेच्योरतर्फका शीर्ष ३ खेलाडीहरुको स्कोर जोडेर विजेता टोलीको घोषणा गरिन्छ । त्यस्तै व्यवसायिकतर्फ दोस्रो स्कोर गर्ने तथा एभेच्योरतर्फका चौथो, पाँचौं र छैटौं खेलाडीको कुल स्कोरको आधारमा दोस्रो टोलीको तय हुन्छ । एभेच्योरतर्फ सातौं, आठौं र नवौं हुने खेलाडी र व्यवसायिकतर्फका तेस्रो खेलाडीको स्कोर जोडेर तेस्रो टोलीको घोषणा गरिन्छ । गल्फ संघका महासचिव घले, सुनसरी जिल्ला गल्फ संघका सचिव तिलक राई र सूर्य नेपाल प्रालीका असिस्टेन्ट ब्रान्ड मेनेजर सौरव भट्टराईले विजेता खेलाडीलाई पुरस्कृत गरे ।