मुस्ताङ (हाम्रो खेलकुद) – टप अफ द वर्ल्ड गल्फ क्लासिकमा श्याम तामाङ र सुष्मा सिंहले क्रमशः पुरुष र महिलातर्फको उपाधि जितेका छन् ।

शनिबार मुस्ताङ जिल्लाको लोमाङथाङ्स्थित मुस्ताङ गल्फ कोर्षमा भएको प्रतियोगितामा काठमाडौंका श्यामले २२ अंक जोड्दै उपाधि जिते । पोखराका बलराम थापाले २० अंक जोड्दै दोस्रो भए । बेस्ट ग्रसको उपाधि रविन्द्र सैनीले जिते । उनले १४ ग्रस अंक जोडेका थिए ‌।

महिलातर्फ उपाधि सुष्मा सिंहले जितिन् । उनले १५ अंक जोडेकी थिइन् । क्लोजेस्ट टु द पिन श्याम सिम्खडा र लंगेस्ट ड्राइभ रविन्द्र सैनीले जिते । होल इन वनमा घोडा पुरस्कार राखेपनि कसैले सो पुरस्कार प्राप्त गरेनन् ।

कोर्ष समुद्री सतहबाट ४ हजार ६ सय ४५ मिटरको उचाईमा रहेको बताइएको छ । भारतको सिक्किममा रहेको याक गल्फ कोर्ष यसअघि सर्वाधिक उचाइमा रहेको गल्फ कोर्षका रुपमा परिचित थियो । याक गल्फ कोर्ष समुन्द्री सतहबाट ३ हजार ९ सय ७० मिटरको उचाईमा रहेको छ ।

प्रतियोगितामा ३६ गल्फरले सहभागिता थिए । सहभागी मध्य ३ महिला गल्फर रहेका छन् । काठमाडौंबाट २१, पोखराबाट १० तथा मुस्ताङ र बुटवलबाट समान २-२ गल्फर सहभागी छन् । एक अमेरिकी गल्फरले पनि खेलेका थिए ।

गल्फ‌ कोर्ष गण्डकी प्रदेश सांसद इन्द्रधारा विष्टको अगुवाईमा निर्माण भएको हो । सांसद विकास कोषबाट १०लाख खर्चेर गल्फ कोर्ष निर्माण गरिएको हो । कोर्ष हाललाई ९ होलको रहेको छ । ३६ पार कोर्षमा २ पार-३, ५ पार-४ र २ पार-५ होल रहेको छ ।

प्रतियोगिता ३/४ स्टेबलफर्ड फर्म्याटमा खेलिएको थियो । लोमान्थाङ् गाउँपालिकाले आयोजना गरेको प्रतियोगितालाई नेपाल प्रोफेसनल गल्फर्स एसोसिएसन र नेपाल गल्फ संघले प्राविधिक सहयोग गरेको छ । हिमालय गल्फ कोर्षका भुवन गुरुङले कोर्ष निर्माणमा सहयोग गरेका थिए ।