काठमाडौं (हाम्रो खलकुद)– एसिया एभिसी सेन्ट्रल जोन भलिबल च्याम्पियनसिपमा भाग लिन नेपाली राष्ट्रिय पुरुष टोली मंगलबार बंगलादेश प्रस्थान गर्दैछ । बंगलादेशको ढाकामा हुने च्याम्पियनसिपमा कुन कुन राष्ट्रसँग प्रतिस्पर्धा गर्नु पर्ने बुधबारको टेक्निकल मिटिङ पछि मात्र थाहा हुने टोलीका प्रशिक्षक जगदिश भट्टले जानकारी दिए ।

सेन्ट्रल जोनमा रहेका १२ राष्ट्रमध्ये भारत, पाकिस्तान, श्रीलंका र भुटानले च्याम्पियनसिपमा भाग नलिने आफुलाई जानकारीमा आएको भट्टले हाम्रो खेलकुदलाई बताए । बाँकी ८ मध्ये ६ राष्ट्रको सहभागिता निश्चित भएको र अन्यका बारेमा त्यहि गएर मात्र थाहा हुने उनले जनाए । नेपालसहित माल्दिभ्स, अफगानिस्तान, आयोजक बंगलादेश, किर्गिस्तान र तुर्किमिनिस्तानको सहभागिता निश्चित भइसकेको भट्टले बताए ।

नेपाली टोलीको लक्ष्यका बारेमा उनले भने,‘हामी पक्कै पनि पदकको लक्ष्य सहित जाँदै छौं । हामी, अफगानिस्तान, माल्दिभ्स र बंगलादेश शारीरिक र प्राविधिक रुपमा धेरै फरक छैनौं । यत्ति हो अनुभव उनीहरुसँग हामी भन्दा अलि बढी छ ।’ अघिल्लो बर्षको प्रदर्शनका आधारमा पनि पदकको सम्भावना रहेको उनको भनाई छ ।

‘हामी गत बर्ष पनि सेमिफाइनल पुगेका थियौं । अन्तमा तेस्रो स्थानको प्रतिस्पर्धामा पाँच सेटमा पुगेर हामी हारेका थियौं’ उनले थपे,‘पछिल्ले ५० दिन देखि हामी अभ्यासमा छौं । आशा गरौं यसपटक पदक जित्न सकिन्छ ।’ नेपाल ओलम्पिक कमिटीका अध्यक्ष जीवनराम श्रेष्ठले सोमबार टोलीको विदाई गरेका थिए ।