काठमाडौं (हाम्रो खेलकुद) – नेपाली राष्ट्रिय यू-२० फुटबल टोलीले साफ यू-२० च्याम्पियनसिप अन्तर्गत आज श्रीलंकासँग खेल्दैछ । भारतको भुवनेश्वरस्थित कालिंगा रंगशालामा हुने खेल नेपाली समयअनुसार साँझ ७:१५ बजे सुरु हुँदैछ ।

प्रतियोगितामा तीन खेल सकिँदा आज दिनको दोस्रो खेल हुँदैछ । आज भएको पहिलो खेलमा बंगलादेशले साविक विजेता भारतलाई पराजित गरेको थियो । यसले नेपाललाई फाइनल पुग्ने समिकरण थप सहज भएको छ । आजको खेलमा श्रीलंकालाई हराएर अर्को खेलमा भारतलाई बराबरीमा रोकेपनि नेपाल फाइनल पुग्ने लगभग पक्का हुनेछ ।

आफ्नो पहिलो खेलमा माल्दिभ्सलाई ४–० को भारी गोल अन्तरले हराएर सुखद् सुरुवात गरेको नेपाल लगातार दोस्रो जितको लक्ष्यमा मैदान उत्रनेछ । माल्दिभ्सविरुद्ध उच्च प्रदर्शन गरेको नेपाल श्रीलंकाविरुद्ध पनि सोही प्रदर्शनलाई निरन्तरता दिँदै लगातार जितको खोजीमा हुनेछ । फाइनल यात्रालाई थप सहज बनाउन पनि नेपाललाई श्रीलंकाविरुद्ध जित आवश्यक छ ।

आजको खेलमा नेपालले पुरानै टोलीलाई निरन्तरता दिएको छ । टोलीसँग सिनियर राष्ट्रिय टोलीबाट अनुभव बटुलिसकेका मिडफिल्डर तथा टोलीका कप्तान आयुष घलानको साथ रहेको छ । आयुषसँगै अग्रपङ्तिमा सुगम सुवालले पहिलो खेलमा उत्कृष्ट प्रदर्शन गरेका थिए । दिपेश गुरुङ, कृतिश रत्न छुन्जु, सुमित श्रेष्ठ र आशिष राईले मिडफिल्डमा प्रभाव जमाएका थिए । अजय चौधरी, अमर श्रेष्ठ, अभिषेक वाइवा, सन्दीप कार्कीसँगै गोलरक्षक ईश्वर गुरुङले टोलीमा स्थान बनाउने देखिन्छ । मनग्य नकर्मीले बेन्चबाट आएर पछिल्लो खेलमा गोल गरेका थिए ।

नेपाली टोलीका प्रशिक्षक मेघराज केसीले श्रीलंकाविरुद्धको खेलको लागि टोली तयार रहेको बताए । ‘हामी च्याम्पियनसिपको लागि सम्पूर्ण तयारी पूरा गरेर नै यहाँ आएका छौं । पहिलो जितले टोलीको मनोवल बढेको छ । बंगलादेश र श्रीलंकाबीचको खेल पनि हेर्न पायौं,’ प्रशिक्षक केसीले भने, ‘श्रीलंकाविरुद्धको खेलका लागि त्यही अनुसारको प्रशिक्षण गरेका छौं । श्रीलंकाविरुद्धको खेलमा नेपालको थप सुन्दर खेल तपाईहरुले हेर्न पाउनुहुनेछ ।’

श्रीलंकाविरुद्ध सुरुवाती ११ : इश्वर गुरुङ (गोलरक्षक), अजय चौधरी, अमर श्रेष्ठ, अभिषेक वाइबा, सन्दीप कार्की, दीपेश गुरुङ, कृतिश रत्न छुन्जु, आशिष राई, सुमित श्रेष्ठ, सुगम सुवाल, आयुष घलान (कप्तान)