काठमाडौं (हाम्रो खेलकुद) – तीव्र गतिका बलर सोमपाल कामी र आदिल अन्सारीको सानदार बलिङमा नेपालले आइसिसी विश्वकप लिग–२ त्रिकोणात्मक ओडिआई सिरिजमा घरेलु टोली स्कटल्यान्ड दयनीय अवस्थामा पुर्याएको छ ।

टिटवुड ग्लासगोमा नेपालका टस हारेर ब्याटिङ थालेको स्कटल्यान्डले २५ ओभरमा ७ विकेट गुमाउँदै ७५ रन बनाएको छ । मार्क वाट् १७ रनमा अविजित छन् । तीव्र गतिका बलर सोमपाल कामीले दोस्रो ओभरको अन्तिम बलमा ओपनर म्याथ्यु क्रसलाई २ रनमा विकेटकिपर आसिफ शेखबाट क्याच गराए ।

करण केसीले सातौं ओभरको अन्तिम बलमा कलुम म्याकलिडलाई १३ रनमा क्याच गराए । उनले २१ बलमा २ चौका प्रहार गरे । उनी एज लागेर फस्ट स्लिपमा रहेका आरिफ शेखबाट क्याच आउट भएका थिए ।

लगत्तै अर्को ओभरको पहिलो बलमा ओपनर काइल कोट्जर सोमपालको बलमा थर्ड स्लिपमा कुशल भुर्तेलबाट ६ रनमा क्याच गराएपछि स्कटल्यान्ड २२–३ को कमजोर अवस्थामा पुगेको थियो ।

आदिल अन्सारीको बलमा एज लागेर जर्ज मुन्शे ४ रनमा कुशल भुर्तेलबाट आउट भए । सोमपालको १२ औं ओभरको पाँचौं बलमा कप्तान रिची बेरिङ्टन ३ रनमा आसिफबाट क्याच आउट भएपछि स्कटल्यान्ड ३३–५ को संकट अवस्थामा पुगेको थियो ।

आदिल अन्सारीले तल्लोक्रमका माइकल लिस्कलाई ४ र शफ्यान शरिफलाई १६ रनमा आउट गरे । दुबै ब्याटर एज लागेर आउट भएका थिए ।

सोमपाल कामीले ८ ओभरमा २७ रन खर्चेर ३ विकेट लिएका छन् । आदिल अन्सारीले ८ ओभरमा १ मेडनसहित २२ रन खर्चेर ३ विकेट लिएका छन् ।