काठमाडौं (हाम्रो खेलकुद) – छैटौ आरबिबी एनभिए राष्ट्रिय महिला तथा पुरुष क्लब लिग-२०७८ अर्को महिना हुने भएको छ । नेपाल भलिबल संघले प्रतियोगिता आगमी वैशाख १८ देखि २४ गतेसम्म राष्ट्रिय खेलकुद परिषद् (राखेप) को कभर्डहलमा संचालन हुने जनाएको छ ।

प्रतियोगितामा पुरुषतर्फ त्रिभुवन आर्मी क्लब, नेपाल पुलिस क्लब, एपिएफ क्लब ,हेल्प नेपाल क्लब, गण्डकी प्रदेश, गल्कोट स्पोर्टस क्लब, ढोरपाटन स्पोर्टस क्लब गरि कुल ७ टोलीको सहभागीता रहनेछ ।

महिलातर्फ होङ्गान्जी न्यु डायमन्ड स्पोर्ट्स क्लब, नेपाल एपिएफ क्लब, त्रिभुवन आर्मी क्लब, नेपाल पुलिस क्लब र एभरेष्ट भलिबल क्लबको सहभागीता रहनेछ । पाँचौं संस्करणमा १२ लाख रुपैयाँ प्रदान गरेको थियो । पुरुषतर्फको ७ टोली र महिलातर्फको ५ टोली क्लब च्याम्पियनसिपबाट छनोट भएको हो ।

संघका महासचिव जितेन्द्र बहादुर चन्दका अनुसार हरेक टोलीले तीन विदेशी खेलाडी राख्न पाउनेछन् । प्रतियोगिता उपाधिमा संघले दोब्बर बृद्धि गरेको जनाएको छ । विजेताले ६ लाख, उप विजेताले ३ लाख, तेस्रोले १ लाख ५० हजार र चौथो हुने टोलीले ७५ हजार प्राप्त गर्नेछन् ।

उत्कृष्ट विधातर्फ सर्वोत्कृष्ट पुरुष तथा महिला खेलाडीले जनही ३५ हजार पाउनेछन् । उत्कष्ट सेटर, ब्लकर सर्भर, स्पाईकर, लिवेरो, प्रशिक्षकले जनही १५ हजार प्राप्त गर्नेछन् ।

उपत्यका बाहिरबाट लिगमा छनौट भएका क्लवहरुलाई प्रोत्साहन एवं यातयात खर्च स्वरुप ७० हजार संघले प्रदान गर्नेछ । प्रतियोगिता अनुमानित खर्च ५५ लाख लाग्ने संघले जनाएको छ । मुख्य प्रायोजकमा राष्ट्रिय वाणिज्य बैंकले निरन्तरता पाएको छ ।

मंगलबार एक कार्यक्रमकाबीच राष्ट्रिय वाणिज्य बैंकका तर्फबाट प्रमुख कार्यकारी अधिकृत (सिइओ) किरण कुमार श्रेष्ठ र नेपाल भलिबल संघका अध्यक्ष मनोरन्जन रमण शर्माले हस्ताक्षर गर्दै आदानप्रदान गर्दै मुख्य प्रायोजकमा निरन्तरता गरे ।

सम्झौता अनुसार बाणिज्य बैंकबाट संघलाई १८ लाख रुपैयाँ प्रायोजन गर्नेछ । जुन पाँचौं संस्करण भन्दा ६ लाख रकम बृद्धि भएको हो । पाँचौं संस्करणमा १२ लाख रुपैयाँ प्रदान गरेको थियो ।