काठमाडौं (हाम्रो खेलकुद) – युवा ब्याटर रोहित पौडेलले पपुवा न्युगिनीसँगको पहिलो ओडिआई खेलमा कीर्तिमानी अर्धशतक पूरा गरेका छन् । २ सय ९३ रनको विशाल विजयी लक्ष्य पछ्याएको नेपालले २८ ओभरमा ४ विकेट गुमाउँदै १ सय ३४ रन बनाएको छ ।

नेपालका लागि रोहित ५४ बलमा ३ चौका र १ छक्कासहित ५० रनमा अविजित छन् । रोहितले ५४ बलमा करिअरको पाँचौं अर्धशतक पूरा गरे । रोहित ओडिआईमा पाँच अर्धशतक प्रहार गर्ने पहिलो नेपाली ब्याटर हुन् । रोहितपछि पूर्व कप्तान ज्ञानेन्द्र मल्लले ४ अर्धशतक प्रहार गरेका छन् । रोहितले सन् २०१९ मा युएईसँग दोस्रो ओडिआईमा ५५ रन बनाएका थिए । त्यसपछि गत असोजमा पपुवा न्युगिनीसँग दोस्रो ओडिआईमा खेलमा ८६ रनको इनिङ खेलेका थिए ।

जुन रोहितको अन्तर्राष्ट्रिय करिअरको उच्च प्रदर्शन हो । त्यसै भ्रमणमा आइसिसी विश्वकप लिग २ मा अमेरिकाविरुद्ध ६२ रन बनाउँदा यसै साता पपुवा न्युगिनीसँग पहिलो ओडिआई खेलमा ६० रन बनाएका थिए । रोहितले पूर्व कप्तान ज्ञानेन्द्र मल्ल र पारस खड्कालाई पछि पार्दै ओडिआईमा नेपालबाट सर्वाधिक रन बनाउने ब्याटर पनि बनेका छन् । उन ५ सयमाथि रन बनाएर खेलि रहँदा दोस्रो स्थानका ज्ञानेन्द्रले १९ खेलमा ४ सय ८० रन बनाएका छन् ।

ओपनर अनिल शाह र कुशल भुर्तेलले पहिलो विकेटका लागि ७.३ ओभरमा ३६ रनको साझेदारी गरेका थिए । तीव्र गतिका बलर नर्मन भानुआले सेसे बाउटबाट अनिललाई ६ रनमा क्याच आउट गराए । २०१८ पछि नेपाली टोलीमा फर्किएका अनिलले २१ बलमा १ चौका प्रहार गर्दै सस्तैमा आउट भए ।

लगत्तै नवौं ओभरको अन्तिम बलमा डेब्यू खेल खेलेका देव खनाल शून्यमा क्याच आउट भए । नोसिना पोकनाको बलमा ठूलो सट खेल्ने धुनमा मिडअनमा देव हिरि हिरीबाट क्याच आउट भए । १० औं ओभरको पहिलो बलमा भानुआले भुर्तेललाई ३२ रनमा बोल्ड आउट गरेपछि नेपालले खराब सुरुवात गरेको छ । भुर्तेल २८ बलमा ६ चौका प्रहार गरे ।

मध्यक्रमका ब्याटर दीपेन्द्रसिंह ऐरी स्पिनर चाल्र्स अमिनीको स्वलो बलमा कभरमा जेसन किलाबाट १५ रनमा क्याच आउट भए । दीपेन्द्र पछिल्ला खेलमा खराब प्रदर्शन गर्दै आएका छन् । युएई भ्रणमा दीपेन्द्र पपुवा न्युगिनीसँग पहिलो खेलमा ८ र युएईसँग ४ रनमा आउट भएका थिए । बाँकी दुई खेलमा भने खाता खोल्न सकेका थिएनन् ।

एक समय ७३–४ को अवस्थामा पुगेको नेपाललाई पाँचौं विकेटका लागि आरिफ शेख र रोहितले ६१ रनको साझेदारी गरि सकेका छन् । आरिफ २० रनका क्रिजमा छन् ।