काठमाडौं (हाम्रो खेलकुद) – तीव्र गतिका बलर सोमपाल कामीले पपुवा न्युगिनीसँगको पहिलो खेलमा नेपाललाई पहिलो सफलता दिलाएका छन् । टियु क्रिकेट मैदानमा टस हारेर पहिला ब्याटिङ थालेको पपुवा न्युगिनीले ५ ओभरमा १ विकेट गुमाउँदै २४ रन बनाएको छ ।

ओपनर टोनी उरा २१ बलमा ३ चौकासहित १९ रनमा अविजित छन् । क्रिजमा असाद भाला छन् । सोमपालले चौथो ओभरको अन्तिम बलमा ओपनर हिरी हिरीलाई विकेटकिपर अनिल शाहबाट ४ रनमा क्याच गराउँदै नेपाललाई पहिलो सफलता दिलाए । लेगा सियाकालाई बेन्चमा राख्दै हिरीलाई ओपनिङ गराएको थियो ।

नेपालले आज तीन परिवर्तन गरेको छ । आसिफ शेखको स्थानमा देव खनाल परेका छन् । युवा ब्याटर देव खनालले आज नेपाली सिनियर टोलीमा डेब्यू गरेका छन् । देवलाई कप्तान सन्दीप लामिछानेले डेब्यू क्याप दिएका हुन् ।

तीव्र गतिका बलर विक्रम सोबको स्थानमा कमलसिंह ऐरीले मौका पाएका छन् । विकेटकिपर विनोद भण्डारीको स्थानमा अनिल शाहलाई मैदान उतारेको छ । नेपालले बेन्चमा गुलशन झा, सुशान भारी, विक्रम सोब र सागर ढकाललाई राखेको छ ।

नेपालको प्लेइङ–११ :

कुशल भुर्तेल, देव खनाल, आरिफ शेख, दीपेन्द्रसिंह ऐरी, रोहित पौडेल, भीम सार्की, अनिल शाह (विकेटकिपर), सोमपाल कामी, कमलसिंह ऐरी, सन्दीप लामिछाने र पवन सरार्फ ।