काठमाडौं (हाम्रो खेलकुद) – स्पिनर सागर ढकालले ओडिआई क्रिकेटमा पहिलो विकेट हात पारेका छन् । आइसिसी विश्वकप लिग–२ मा घरेलु टोली युएईविरुद्ध सागरले पहिलो विकेट लिएका हुन् ।

दुबई इन्टरनेशल क्रिकेट स्टेडियममा टस जितेर पहिला ब्याटिङ थालेको युएईले ४१ ओभरमा ७ विकेट गुमाउँदै १ सय ३७ रन बनाएको छ । सागरको ४१ औं ओभरको तेस्रो बलमा ठूलो सट खेलेका बासिल हामिद लङअनमा ज्ञानेन्द्र मल्लबाट १४ रनमा क्याच आउट भए । सागरले अघिल्लो खेलमा पपुवा न्युगिनीविरुद्ध ओडिआईमा डेब्यू गरेपनि विकेट विहीन बनेका थिए ।

युएईका अनुभवी बायाँ हाते ब्याटर रोहन मुस्तफा ८१ बलमा २ चौका र १ छक्कासहित सर्वाधिक ४० रनमा आउट भए । सिपी रिजवान ८५ बलमा ४० रनमै आउट भए । खराब सुरुवात गरेको युएईलाई पाँचौं विकेटका लागि मुस्तफा र रिजवानले ७७ रनको साझेदारी गरे ।

चौथो ओभरको पाँचौं बलमा ओपनर चिराग सुरीलाई सोमपालले ६ रनमा आउट गर्दै नेपाललाई पहिलो सफलता दिलाए । सुरी आउट साइड एज लागेर विकेटकिपर आसिफ शेखबाट क्याच भए ।

१९ वर्षीय विकेटकिपर वृत्य अरविन्द यस खेलमा भने चल्न सकेनन् । अन्तर्राष्ट्रिय क्रिकेटमा सानदार ब्याटिङ गर्दै आएका वृत्यलाई सोमपालले आसिफबाट ३ रनमा क्याच आउट गराउँदै नेपाललाई प्रमुख सफलता दिलाए । वृत्य आउट साइड एज लागेर क्याच आउट भए ।

सोमपालले १० औं ओभरको पहिलो बलमा ओपनर मोहम्मद वासिमलाई २१ रनमा कुशल भुर्तेलबाट क्याच गराउँदै प्रमुख तीन विकेट लिँदै पूर्ण रुपमा दबाबमा राखेका थिए । वासिमले २८ बलमा ३ चौका प्रहार गरे । करण केसीले आसिफ खानलाई २ रनमा आसिफबाटनै क्याच गराएपछि युएई १०.३ ओभरमा ३५–४ को अवस्थामा पुगेको थियो ।