काठमाडौं (हाम्रो खेलकुद) – शीर्ष वरीयताका भुवन नगरकोटीले सूर्य नेपाल गल्फ टुर २०२१–२२ अन्तर्गत चौथो इभेन्ट सूर्य नेपाल एनपीजीए म्याच प्लेको उपाधि जितेका छन् ।

रोयल नेपाल गल्फ क्लबमा बिहीबार ३६ होलमा खेलिएको फाइनलमा नेपाल नम्बर १ भुवनले चौथो वरीयताका संजय लामालाई ३/२ ले पराजित गरे । सुरुवाती ९ होलको खेलमा २ खेल अघि रहेका संजय १८ होलपछि १ खेल अघि थिए । भुवनले २७ होलपछि पहिलो पटक १ होलको अग्रता लिएका थिए भने ३० होलको समाप्तिमा तीन होलको अग्रता बनाए । दुवै गल्फरले अर्को चार होल बराबरी खेलेपछि भुवनले दुई होल बाँकी रहँदा जित पक्का गरे ।

भुवनको यो करियरको आठौं र सूर्य नेपाल गल्फ टुर २०२१–२२ को पहिलो उपाधि हो । ट्रफीसँगै भुवनले ५० हजार रुपैयाँ प्राप्त गरे । उपविजेता संजयले ३० हजार रुपैयाँ हात पारे । पाँचौ वरियताका धनबहादुर थापाले तेस्रो स्थानका विकास अधिकारीलाई २ होलको अग्रतामा पराजित गर्दै तेस्रो स्थान हासिल गरे । धनले २२ हजार र विकासले १८ हजार प्राप्त गरे ।

क्वाटरफाइनलमा पराजित दिनेश प्रजापति, रामे मगर, जयराम श्रेष्ठ र दीपक मगरले जनही १० हजार रुपैयाँ प्राप्त गरे । त्यसैगरी पहिलो राउण्डमा हारेका आठ खेलाडी सचिनप्रसाद भट्टराई, सूर्यप्रसाद शर्मा, बल भद्र राई, भुवनकुमार रोक्का, कृष्णमान राजबाहक, रवि खड्का र शिवकुमार माझीले ५–५ हजार रुपैयाँ प्राप्त गरे ।

पछिल्लो पटक पूर्ण सिजन खेलिएको सूर्य नेपाल गल्फ टुर २०१८–१९ सिजनका शीर्ष १६ व्यावसायिक गल्फरहरूले प्रतियोगितामा सहभागीता जनाएका थिए । दोस्रो वरियताका शिवराम श्रेष्ठ र १४औं वरियताका दीपक आचार्यले प्रतियोगितामा भाग नलिएपछि १७औं वरियताका शिवकुमार माझी र १८औं वरियताका सचिन भट्टराईले प्रतिस्पर्धा गरेका थिए ।

प्रतियोगिताका विजेताहरुलाई सूर्य नेपाल प्रालिका उपाध्यक्ष (मार्केटिङ) दिप्रा लाहिरी र आरएनजीसीका अध्यक्ष प्रचण्डबहादुर श्रेष्ठले पुरस्कार वितरण गरेका थिए । सूर्य नेपाल प्रालिको प्रायोजनमा नेपाल पीजीएले आयोजना गरेको प्रतियोगितामा कुल पुरस्कार राशी दुई लाख रुपैयाँ रहेको थियो ।