काठमाडौं (हाम्रो खेलकुद) – नेपाल नम्बर १ व्यावसायिक गल्फर भुवन नगरकोटीसँगै शीर्ष वरीयताका खेलाडी सुर्य नेपाल गल्फ टुर २०२१-२२ अन्तर्गत चौथो इभेत्न सुर्य नेपाल एनपीजीए म्याच प्लेको क्वाटरफाइनलमा प्रवेश गरेका छन् ।

रोयल नेपाल गल्फ क्लबमा पहिलो दिन मंगलबार भुवनले १८ औं वरीयताका सचिन भट्टराईलाई ६/४ ले पराजित गरे । ४ होल बाँकी रहँदा ६ अंकले अघि उनी पहिलो दिनको सर्वाधिक अंक हासिल गर्ने खेलाडी बने । भुवनले बुधबार हुने क्वाटरफाइनलमा नवौं वरीयताका दिनेश प्रजापतिसँग खेल्नेछन् । दिनेशले दशौं वरीयताका सुर्यप्रसाद शर्मालाई ३/२ स्कोरले हराएका थिए ।

पछिल्लो पटक सम्पन्न पूर्ण सिजनको वरीयतालाई आधार मान्दै शीर्ष १६ गल्फरले यस प्रतियोगितामा प्रतिस्पर्धा गर्दैछन् । त्यस सिजनका दोस्रो वरीयताका शिवराम श्रेष्ठ र १४ औं वरीयताका दीपक आचार्यको स्थानमा १७ औं वरीयताका शिवकुमार माझी र १८ औं वरीयताका सचिन भट्टराईले प्रतिस्पर्धा गर्दैछन् । सचिनसँगै शिव पनि प्रतियोगिताबाट बाहिरिसकेका छन् । शिवलाई तेस्रो वरीयताका विकास अधिकारीले ५/४ स्कोरले पराजित गरे ।

चौथो वरीयताका संजय लामाले १५ औं वरीयताका रामकृष्ण श्रेष्ठलाई ५/४ स्कोरले हराए । पाँचौ वरीयताका धनबहादुर थापाले १३ औं वरीयताका बलभद्र राई तथा छैटौं वरीयताका रामे मगरले भुवन कुमार रोक्कालाई अन्तिम होलमा पराजित गरे । जयराम श्रेष्ठले कृष्णमान राजवाहकलाई ५/४ ले पराजित गर्दा दीपक मगरले रवी खड्कालाई १८ होलमा रोक्दै दोस्रो एक्स्ट्रा होलमा स्तब्ध पारे ।

बुधबार ४ क्वाटरफाइनल र सेमिफाइनल खेल हुनेछ । तेस्रो स्थान र फाइनल खेल विहीबार हुनेछ । फाइनल खेल ३६ होल तथा बाँकी सबै १८ होलको खेल हुनेछ ।

नेपाल व्यावसायिक गल्फर संघले सुर्य नेपाल प्रालिको आयोजनामा गरेको प्रतियोगिताको कुल पुरस्कार राशी २ लाख रुपैयाँ रहेको छ । विजेताले ५० हजार प्राप्त गर्दा शीर्ष ४ ले क्रमश: ३०, २२ र १८ हजार प्राप्त गर्नेछन् । क्वाटरफाइनलमा पराजित हुनेले १० हजार र पहिलो चरणमा बाहिरिनेले ५ हजार पाउनेछन् ।