काठमाडौं (हाम्रो खेलकुद) – किसुनजी स्मृती राष्ट्रिय महिला तथा पुरुष खुला हाफ म्याराथन अर्को महिना आयोजना हुने भएको छ। पूर्व प्रधानमन्त्री तथा नेपाल कांग्रेसका पूर्व सभापति कृष्णप्रसाद भट्टराई (किसुनजी) को स्मृतिमा नेपाल लोकतान्त्रिक खेलकुद संघको तत्वावधान तथा बागमती प्रदेश संघले गत वर्षदेखि आयोजना गर्न लागेको हो ।

यसपटक चैत १९ गते हाफ म्याराथन आयोजना गरिने आयोजक नेपाल लोकतान्त्रिक खेलकुद संघ, बागमती प्रदेशले सोमबार पत्रकार सम्मेलनमार्फ जानकारी दिएको छ । देशभर रहेको प्रतिभावान खेलाडीहरुलाई अवसर प्रदान गर्ने, भाईचारा र आपसी सहयोगको सम्वन्धलाई अझ प्रगाढ बनाउने तथा खेलकुदलाई ब्यावसायिकरण गर्ने प्रतियोगिताको उद्देश्यका साथ हाफ म्याराथनको सुरुवात गरिएको प्रदेशका अध्यक्ष दीपक गुरुङले बताए ।

झण्डै ११ लाख रुपैयाँ खर्च हनु अनुमान गरिएको प्रतियोगिताको दुवैतर्फका विजेताले ५० हजार, दोस्रोले ३० र तेस्रो हुने खेलाडीले २० हजार रुपैयाँ प्राप्त गर्नेछन् । अघिल्लो संस्करणको तुलनमा यस पटक पुरस्कार राशीलाई दोब्बर पारिएको अध्यक्ष गुरुङले बताए । म्याराथनको समापनमा गत वर्ष जस्तै खेलकुदमा जीवन व्यतित गर्ने, खेलकोे विकास र विस्तारमा योगदान खेलकुद क्षेत्रमा बिशेष योगदान गर्ने खेलाडी, प्रशिक्षक र खेल पत्रकारलाई समेत नगद सहित सम्मान गरिने बताइएको छ ।

नेपाल एथलेटिक्स संघका सचिव आर.के. बिष्टले हाफ म्याराथन आयोजनालाई निरन्तरता प्रदान गर्नुले छोटो दुरीका खेलाडीहरुले प्रोत्साहान प्राप्त गर्ने महत्वपूण रहेको बताए । उनले प्रतियोगितालाई संघको स्विकृती प्रदान हुने र आगामी दिनमा संघको क्यालेन्डरमानै समावेश गराउने तर्फ पहल हुने बताए । पहिलो संस्कण २०७७ चैत महिनामा नै आयोजना भएको थियो ।

प्रतियोगिताको रुट गोल्फुटार बास्केटबल कोर्टबाट सुरु भई धुम्बाराही चोक, सुकेधारा, चावहिल, जयबागेश्वरी, गौशाला, रातोपुल, ज्ञानेश्वर, कमलपोखरी, हात्तीसार, जयनेपाल, दरवारमार्ग, केशरमहल, लैनचौर, लाजिम्पाट, पानिपोखरी, नारायणगोपाल चोक, गोल्फुटार, नारायणथान हुँदै पुन गोल्फुटार बास्केटबल कोर्ट पुगेर टुंगिने बताइएको छ । अध्यक्ष गुरुङले संघले भविष्यमा महिला राष्ट्रिय बास्केटबल आयोजना गर्ने समेत जानकारी दिए ।