काठमाडौं (हाम्रो खेलकुद)– एभिसी सेन्ट्रल जोन च्याम्पियन महिला राष्ट्रिय भलिबल टोलीलाई सरकारले नगद पुरस्कारसहित सम्मान गरेको छ । गत महिना बंगलादेशमा भएको सेन्ट्रल जोनमा नेपाली टोलीले लगातार दोस्रो पटक जितेको थियो ।

प्रधानमन्त्री शेरबहादुर देउवाले प्रधानमन्त्री निवास बालुवाटारमा शुक्रबार भलिबल टोलीका खेलाडी, प्रशिक्षक र अफिसियललाई नगद र सम्मान पत्रले सम्मान गरे । उपाधि विजेता १२ जना खेलाडी जनही ५ लाख, २ जना प्रशिक्षक जनही ३ लाख र १ जना अफिसियल २ लाख नगदले पुरस्कृत भए ।

नेपालले बंगलादेशको ढाकामा पुस १३ गते फाइनलमा उज्वेकिस्तानलाई ३–२ को रोमाञ्चक सेटमा सानदार जित निकाल्दै उपाधि रक्षा गर्न सफल भएको थियो । यसअघि नेपालले २०१९ मा माल्दिभ्सलाई हराउँदै एक सेट पनि नगुमाई उपाधि जितेको थियो ।

यसपटकको च्याम्पियनसिपमा श्रीलंका र उज्वेकिस्तान थपिदा नेपालले दुवै टोलीसँग समान २–२ सेट गरी ४ सेट गुमाउन पुगेको थियो । नेपालले १८ सेट आफ्नो पक्षमा पारेको थियो । पुरुषतर्फ नेपाल उज्वेकसस्तानसँग सोझो सेटमा पराजित हुँदै पदक विहीन बन्न पुगेको थियो ।

महिला टोली : प्रतिभा माली, सरस्वती चौधरी, शान्ति थारु, उषा भण्डारी, साफिया पुन, सुनिता खड्का, मनिषा चौधरी, कामना विष्ट, लक्ष्मी चन्द, सलिना श्रेष्ठ, अरुणा शाही र कृपा अधिकारी, जगदिश प्रसाद भट्ट (मुख्य प्रशिक्षक), भरत यादव (प्रशिक्षक) र ज्योति केसी (व्यवस्थापक)