काठमाडौं (हाम्रो खेलकुद) – प्रो शुक्रबहादुर राईले सुर्य नेपाल गल्फ टुर २०२१-२२ मा लगातार दोस्रो उपाधि जितेका छन् । धरान गल्फ क्लबका प्रो शुक्रले शुक्रबार सुर्य नेपाल सेन्ट्रल ओपनको उपाधि जित्दै १ लाख ३० हजार रुपैयाँ हात पारे ।

गोकर्ण गल्फ क्लबमा सम्पन्न सिजनको तेस्रो प्रतियोगिता शुक्रले शुक्रबार अन्तिम दिन १ ओभर ७३ स्कोरसहित कुल १० अन्डर २ सय ७८ स्कोर जोड्दै शुक्रले उपाधि जितेका हुन् । उनले दोस्रो स्थानका रवि खड्कालाई १ स्ट्रोकले पछि पारे । रविले अन्तिम दिन ४ अन्डर ६८ स्कोर जोडेपनि उपाधि जित्नबाट बन्चित भए । रविले ८८ हजार रुपैयाँमा चित्त बुझाए ।

तेस्रो स्थानमा स्थानीय प्रो भुवन नगरकोटीले अन्तिम दिन इभन पार ७२ सहित कुल ६ अन्डर २ सय ८२ स्कोर बनाए । उनले ६५ हजार रुपैयाँ प्राप्त गरे । एमेच्योरतर्फ १३ औं सागका दोहोरो स्वर्ण विजेता सुभाष तामाङले कुल ४ अन्डर २ सय ८४ अंकसहित उपाधि जिते । उनी समग्रमा चौथो स्थानमा रहे । यत्सु सद्भाव आचार्यले ५ ओभर २ सय ९३ स्कोरका साथ एमेच्योरतर्फ उपविजेता बने ।

प्रतियोगितामा ३९ व्यावसायिक र १९ एमेच्योर गल्फरको सहभागिता रहेको थियो । कुल ७ लाख ७५ हजार पुरस्कार राशी रहेको प्रतियोगितामा दोस्रो चरणमा स्थान बनाउने २१ व्यावसायिक गल्फरले नगद पुरस्कार जिते । विजेतालाई सुर्य नेपाल प्रालिका सहायक ब्रान्ड म्यानेजर नविन सरोज र पिजिए नेपालका सल्लाहकार घनश्याम थापाले पुरस्कृत गरे ।