पोखरा (हाम्रो खेलकुद) – विभागीय नेपाल पुलिस क्लबले दोस्रो संस्करणको टाइगर कप आमन्त्रित खुल्ला क्लब च्याम्पियनसिप महिला तथा पुरुष भलिबल प्रतियोगितामा पुरुषतर्फ लगातार तेस्रो जित निकाल्दै फाइनल पुग्ने सम्भावना बलियो बनाएको छ ।

पोखरा रंगशालास्थित भलिबल कोर्टमा बुधबार भएको खेलमा पुलिसले अर्काे विभागीय टोली नेपाल एपिएफ क्लबलाई ३–१ को सेटमा पराजित गर्दै फाइनल पुग्ने सम्भावना बलियो बनाएको हो ।

पुलिसले एपिएफमाथि २५–२१, २३–२५, २५–२३ र २५–१९ को जित निकाल्यो । जितसँगै अपराजित रहेको पुलिसको ३ खेलबाट ८ अंक पुगेको छ । एपिएफले लगातार तेस्रो खेलमा हार बेहोर्दै प्रतियोगिताबाट बाहिरिएको छ ।

अर्काे खेलमा टिप टप हेल्प नेपाल स्पोर्ट्स क्लबले विभागीय त्रिभुवन आर्मी क्लबमाथि ३–० को सोझो सेटमा जित निकाल्दै प्रतियोगितामा पहिलो जित निकालेको छ । हेल्प नेपालले आर्मीलाई २५–१५, २५–२१ र २५–२२ को सोझो सेटमा पराजित गरेको हो । जितपछि हेल्प नेपालको दुई खेलबाट ४ अंक पुगेको छ । आर्मीको दुई खेलबाट ३ अंक छ ।

महिलातर्फ नेपाल एपिएफ क्लबले होङ्गान्जी न्यु डायमन्ड स्पोर्ट्स क्लबमाथि ३–२ को प्रतिस्पर्धात्मक जित निकालेको छ । एपिएफले २१–२५, २५–२१, १०–२५, २५–१२ र १५–८ को जित निकाल्यो । जितसँगै एपिएफको दुई खेलबाट ५ अंक पुगेको छ । हारका बावजुत डायमन्ड ३ खेलबाट ७ अंक जोडेर शीर्षस्थानमा रहेको छ ।

अर्काे खेलमा पुलिसले आयोजक टाइगर ग्रुप अफ पोखरालाई ३–० को सोझो सेटमा पराजित गर्दै पहिला जित दर्ता गरेको छ । पुलिसले टाइगरमाथि २५–२०, २५–१७ र २५–२२ को सोझो सेटमा जित निकालेको हो । जितसँगै पुलिसको दुई खेलबाट ३ अंक छ । टाइगरले अंकको खाता खोल्न सकेको छैन ।

१ माघसम्म हुने प्रतियोगितामा महिला तथा पुरुषतर्फ समान ५–५ टोलीको सहभागिता रहेको छ । महिला र पुरुषतर्फको विजेताले समान ३ लाख, उपविजेता टोलीले १ लाख ५० हजार, तेस्रो हुनेले ७५ हजार र सान्त्वना हुने टोलीले ३५ हजार प्राप्त गर्नेछ । महिला तथा पुरुषतर्फको सर्वाेत्कृष्ट खेलाडीले समान २५ हजार प्राप्त गर्नेछ ।

हरेक विधाका उत्कृष्ट (स्पाइकर, सेटर, ब्लकर, सर्भर, लिवेरो र प्रशिक्षक) ले समान १०–१० हजार रुपैया हात पार्नेछन् । प्रतियोगितामा बिहीबार पुरुष र महिलातर्फ समान दुई खेल हुनेछ । पुरुषतर्फ आर्मी र गण्डकी तथा हेल्प नेपाल एपिएफबीच प्रतिस्पर्धा हुनेछ । महिलातर्फ आर्मी र टाइगर ग्रुप तथा न्यु डायमन्ड र पुलिसबीच प्रतिस्पर्धा हुनेछ ।