उत्तम रिजाल, झापा

दमक नगरपालिकाले कनकाई कप भलिबल प्रतियोगिताको उपाधि जितेको छ । झापाको सुरुङ्गामा बुधबार सम्पन्न खेलमा झापा गाउँपालिकालाई ३–१ को सेटमा पराजित गर्दै दमकले उपाधि जितेको हो ।

पहिलो सेटमा २५–१६ को जित हात पार्दै खेलमा अग्रता लिएको दमकले दोश्रो सेटमा रबिन गौतमले उत्कृष्ट प्रदर्शन गरेपछि २२–२५ ले गुमाउन पुगेको थियो । तर, तेश्रो सेटमा धन बहादुर भट्ट, ज्योति प्रकाश लावती र हरिबहादुर अधिकारीले उत्कृष्ट प्रदर्शन गरेपछि दमकले २५–१९ को जित निकाल्दै खेलमा २–१ को अग्रता लियो ।

चौथो सेटमा पनि दमकले उत्कृष्ट प्रदर्शन गरेपछि २५–२३ को जित निकाल्दै उपाधि जितेको थियो । दमकका धन बहादुर भट्ट फाईनल खेलको म्यान अफ द म्याच भए । जितसँगै दमकले १ लाख १ हजार १ सय ११ हात पार्यो । झापाले ५१ हजार रुपैयाँ प्राप्त गर्यो ।

त्यस्तै झापाका गणेश कट्वालले बेष्ट डिफेन्स र दमकका हरिबहादुर अधिकारीले बेष्ट क्विकर पाए । दमककै हरिहजुर थापा बेष्ट सेटर भए भने झापाका रोहित शिवाकोटी बेष्ट ब्लकर भए । दमकका धन बहादुर भट्टले प्रतियोगिताकै सर्वोत्कृष्ट खेलाडीको उपाधिले हात पारे । उनले नगद १० हजार रुपैयाँ समेत प्रप्त गरे ।

प्रतियोगिताको विजेता तथा उप–विजेताहरुलाई प्रमुख अतिथि प्रतिनिधि सभा सांसद एलपी साँवा, कनकाई नगरपालिकाका प्रमुख राजेन्द्र कुमार पोखरेल, सभाध्यक्ष तथा सुरुङ्गा जेसीज बर्ष २०२१ को अध्यक्ष उषा यदुका उप्रेति लगायतले पुरस्कार प्रदान गरेका थिए । सुरुङ्गा जेसिजले आयोजना प्रतियोगितामा प्रदेश १ का ६ पालिकाको सहभागिता थियो ।