उत्तम रिजाल, झापा
दमक नगरपालिका र झापा गाउँपालिका आ आफ्नो समूहको विजेता बन्दै झापाको सुरुङ्गामा जारी प्रदेश १ स्तरीय अन्तर पालिका कनकाई कप भलिबल प्रतियोगिताको सेमिफाइनलमा प्रवेश गरेका छन् ।

दमकले सोमबार समुह ए को अन्तिम खेलमा उपाधि दाबेदार भोजपुरको आमचोक गाउँपालिकालाई र समुह बी को खेलमा झापाले मोरङ्गको बेलबारी नगरपालिकालाई पराजित गर्दै समूह आ आफ्नो समूहको विजेता बनेका हुन् । तीन राष्ट्रिय खेलाडीसहित मैदानमा उत्रिएको दमकले आमकोचमाथी सोझो सेटमा जित हात पारेको थियो । दमकले आमचोकलाई २५–२१, २५–२२ र २५–२३ को सोझो सेटमा पराजित गरेको थियो ।

दमकबाट राष्ट्रिय खेलाडी धनबहादुर भट्ट, हरिहजुर थापा र हरिबहादुर अधिकारीले खेलेका थिए । तीनै खेलाडी हालै बंगलादेशमा सम्पन्न एभिसी सेन्ट्रल जो च्याम्पियनसिप खेलेर फर्केका हुन् । धनबहादुर खेलको म्यान अफ द म्याच चुनिए । त्यस्तै झापाले बेलबारी नगरपालिकालाई २५–२२, २५–२२ र २५–१३ को सोझो सेटमा पराजित गरेको थियो । विजेता टोलीका रोहित शिवाकोटी म्यान अफ द म्याच घोषित भए ।

फाइनल प्रवेशका लागि मंगलबार दमकले समुह बी को उप–विजेता बेलबारी तथा झापाले समुह ए को उप–विजेता आमचोकसँग प्रतिस्पर्धा गर्नेछ । प्रदेश १ का ६ पालिकाको सहभागिता रहेको सो प्रतियोगितामा प्रत्येक पालिकाले तीन जना राष्ट्रिय तथा अन्तराष्ट्रिय खेलाडी सहभागी गराउँन पाउने छन् । प्रतियोगिताको विजेताले नगद एक लाख एक हजार एक सय एघार तथा उप–विजेताले नगद एकाउन्न हजार हात पार्नेछ । प्रतियोगिताको आयोजना सुरुङ्गा जेसीजले गरेको हो ।