काठमाडौं (हाम्रो खेलकुद) – चर्चित भलिबल खेलाडी अमृत केसी झन्डै १० महिना मैदान बाहिर रहने भएका छन् । बायाँ खुट्टामा लागेको चोटको शल्यक्रिया गरेका कारण उनी लामो समय मैदान बाहिर रहने भएका हुन् ।

स्याङ्जाको पुतलीबजारमा भएको सर्वाधिक धनराशिको अन्तर पालिका स्तरीय दोस्रो पुतलीबजार कप भलिबल प्रतियोगिता खेल्ने क्रममा स्पाइक गरेर ल्यान्डिङ नमिल्दा उनले चोट बोक्न पुगेका थिए । उनको पोस्टेरिएर क्रुसिएट लिगामेन्ट (पिसिएल), एन्टेरियर क्रुसिएट लिगामेन्ट (एसिएल) र मेडिकल कोलाटेरल लिगामेन्ट (एमसिएल) मम चोटसँगै दुई मिनिस्कस मध्ये एकमा पुरै चोट र अर्काेमा आंशिक चोट देखिएको छ ।

अमृतको मंगलबार ललितपुरस्थित बि एन्ड बि अस्पतालमा प्रख्यात डा. अमित जोशीको नेतृत्वमा करिव ४ घन्टापछि सफलतापुर्वक शल्यक्रिया भएको छ । शल्यक्रिया एकदमै राम्रो भएको र कोर्टमा फर्कन कम्तीमा पनि १० महिना लाग्ने बताइएको छ ।

अमृतको बुधबारदेखि नै फिजियोथेरापी प्रक्रिया सुरु भइसकेको छ । पहिलो दिन बढी दुखाई महसुस भएपनि दोस्रो दिन दुखाई महसुस कम भएको बताए । ‘सबै कुरा राम्रो भइरहेको छ । अस्पतालमै फिजियोथेरापी पनि सुरु गरिसकेको छु । राम्रै भइरहेको छ । तीन देखि चार दिनमा अस्पतालले अवस्था हेरेर डिस्चार्ज गर्ने भनेको छ ।’

अमृतले भने, ‘ठुलो सपना बोकेर घरेलु कोर्ट (पोखरा) मा टाइगर कप आमन्त्रण भलिबल खेल्ने आएको थिएँ । यस वर्ष पूरा भएन । अर्काे वर्ष अवश्य पनि बलियो भएर आउनेछु ।’

अस्पतालबाट डिस्चार्ज भएपछि एक महिना काठमाडौंमै र त्यसपछि भारतमा गएर फिजियो गराउने उनले बताए । उपचारमा फिजियो थेरापीसहित ८ लाख भन्दा बढी खर्च हुने अनुमान छ ।

यसैबीच टिप टप हेल्प नेपाल स्पोर्ट्स क्लबले आफ्नो महत्वपुर्ण स्पाइकर अमृतको उपचारका लागि १ लाख ५० हजार रुपैयाँ सहयोग हस्तान्तरण गरेको छ । स्याङ्जा विरुवाका अमृतले भारतीय सेनामा कार्यरत भएपनि नेपाल आएको बेला गण्डकी प्रदेश र हेल्प नेपाल स्पोर्ट्स क्लबबाट घरेलु भलिबल खेल्ने गर्दछन् ।