काठमाडौं (हाम्रो खेलकुद) – एभिसी सेन्ट्रल जोन भलिबल अन्तर्गत नेपाली महिला राष्ट्रिय भलिबल टोलीले लगातार तेस्रो जित दर्ता गरेको छ । आयोजक बंगलादेशलाई सोझो सेटमा पराजित गर्दै नेपालले फाइनलनजिक पुगेको हो ।

शनिबार आयोजक टोलीविरुद्ध नेपालले औसत प्रदर्शन गर्दै एकपक्षीय नतिजा निकालेको हो । पहिलो सेटमा २५-५ को सहज जित निकालेको नेपालले दोस्रो सेट २५-१५ ले जितेको थियो । तेस्रो सेटमा कमजोर सुरुवात गरेपनि नेपालले २५-१७ को जित हासिल गर्यो ।

नेपालले पहिलो खेलमा श्रीलंकालाई ३–२ को सेटमा तथा दोस्रो खेलमा माल्दिभ्सलाई ३–० को सोझो सेटमा पराजित गरेको थियो । नेपालको तीन खेलबाट ८ अंक छ । दोस्रो स्थानमा रहेको उज्वेकिस्तानको ६ अंक छ । यस्तै श्रीलंकाको ४ तथा किर्गिस्तानको ३ अंक छ । बंगलादेशले अंकको खाता खोल्न सकेको छैन ।

महिलातर्फ आयोजक बंगलादेश, किर्गिस्तान, माल्दिभ्स, नेपाल, श्रीलंका र उज्वेकिस्तान गरी ६ राष्ट्रको सहभागिता छ । राउन्ड रोबिनको आधारमा हुने प्रतियोगिताको शीर्ष दुई टोलीले फाइनलमा प्रतिस्पर्धा गर्नेछन् । त्यस्तै, तेस्रो र चौथो टोलीले तेस्रो स्थानको लागि प्रतिस्पर्धा गर्नेछ । फाइनल २९ डिसेम्वरमा हुनेछ ।

पुरुषतर्फ नेपालले आज नै नेपालले श्रीलंकासँग साँझ ५:४५ बजे खेल्दैछ । नेपाल दोस्रो जितको खोजीमा हुनेछ । पहिलो खेलमा आयोजक बंगलादेशसँग सोझो सेटमा हार बेहोरेको नेपाल उज्वेकिस्तानलाई ३–१ को सेटमा हराउँदै जित निकालेको थियो । पुरुषतर्फ आयोजक बंगलादेश, माल्दिभ्स, नेपाल, श्रीलंका र उज्वेकिस्तान गरी पाँच राष्ट्रको सहभागिता रहेको छ ।